Ikipe ya Manchester United mu Bwongereza, kuri iki cyumweru tariki ya cyenda Ukuboza 2012 yashyize ikinyuranyo cy’amanota atandatu hagati yayo na Manchester City iyikurikiye nyuma yo kuyitsinda mu mukino wazihuje.

Umukino watangiye Man U itsinda ibitego biyoroheye, mu gihe nyamara Man City ari yo yari yihariye umupira. Wayne Rooney yatsinze ibitego bibiri mu gice cya mbere cy’umukino byanatumye iki gice kirangira Man U iyoboye umukino n’ibitego bibiri ku busa.

Mu gice cya kabiri Man City yaje ishaka kwishyura ndetse birayihira, kuko yishyuye ibitego bibiri yari yatsinzwe ndetse ikomeza gusatira.

Gusa umuvuduko wa City wayoyotse ubwo Robin Van Persie yateraga ‘free kick’ igahita ivamo igitego cy’insinzi cya Man U habura igihe gito ngo umusifuzi arangize umukino.

Manchester United ubu ni iya mbere n’amanota 39, Man City ya kabiri ikaba ifite 33 naho Chelsea iza ku mwanya wa gatatu ifite amanota 29.

Biragaragara ko Man U ikomeje kongera ikinyuranyo ku makipe ayikurikiye, bivuze ko ishobora kutazagorwa n’imikino myinshi ikinwa mu mpera z’umwaka muri shampiyona yo mu Bwongereza.

Man City yatsinzwe uyu mukino nyuma yo kuva mu marushanwa y’amakipe yabaye aya mbere iwayo mu Burayi Champions League, ntibone n’amahirwe yo kujya mu gikombe cya Europa League.

Umukino hagati ya Manchester wari uwo ku munsi wa 16 wa shampiyona.