Umusore w’umunyarwanda w’imyaka 17, Mugabo Alfred ukinira ikipe ya Arsenal, ubu yatangiye gukinira Arsenal y’abatarengeje imyaka 21.

Muri shampiyona y’uyu mwaka wa 2012/2013 muri England Premier League U21 (shampiyona y’u Bwongereza y’abatarengeje imyaka 21); Arsenal imaze gutsinda imikino yayo yose uko ari ibiri. Yatsinze kandi Bolton 3-1 ku wa 20 Kanama; ndetse yongera gutsinda Blackburn; ubu ikaba ari yo ya mbere muri shampiyona y’abatarengeje imyaka 21 mu Bwongereza.

Aganira n’ikinyamakuru Izuba Rirashe kuwa 31 Kanama 2012; Mugabo Alfred yavuze ko impamvu yagize amahirwe yo guhita avanwa mu ishuri ry’umupira w’amaguru rya Arsenal akajya mu ikipe y’abasimbura ya Arsenal; ari uko yagaragaye mu gikombe cy’isi cy’abatarengeje imyaka 17 cyabereye muri Mexique akinira u Rwanda.

Mugabo Alfred wambaye umupira w'umuhondo

Yagize ati “ kuva twava mu gikombe cy’Isi; umutoza Liam Brady wa Arsenal y’abatarengeje imyaka 21 yambwiye ko ntagomba gusubira muri academy kubera ubunararibonye nari mvanye mu gikombe cy’Isi. Amahirwe nagize ni uko Brady ari nawe wari diregiteri w’ishuri ry’umupira w’amaguru ryacu bituma anshyira muri Arsenal y’abatarengeje imyaka 21, nubwo bikingora kubona umwanya wo gukina; cyane cyane ko ifite abakinnyi banduta kandi bakomeye. Ariko mfite icyizere ko mu minsi iri mbere nzajya mbona umwanya yemwe nkabanza no mu kibuga.”

Mugabo yishimira urwo rwego amaze kugeraho ndetse akavuga ko igihe cyose u Rwanda ruzongera kumwiyambaza ngo arukinire azaza.

Arsenal y’abatarengeje imyaka 21 irongera gukina kuri uyu wa Mbere tariki ya 03 Nzeli mu mukino wa gatatu na Everton.

Inkuru y’Izuba Rirashe