Shampiyona y’umupira w’amaguru mu Rwanda mu cyiciro cya mbere, iratangira mu mpera z’iki Cyumweru, itangirane n’umubare w’amakipe 14.

Nk’uko urubuga rw’Ishyirahamwe ry’umupira w’amaguru mu Rwanda (FERWAFA) rubigaragaza, shampiyona y’umwaka w’imikino wa 2012/2013, amakipe yariyongereye ugereranyije no mu myaka yashize .

Umwaka wa 2010/2011 mu mupira w’amaguru mu Rwanda amakipe yari 12; mu 2011/2012 hiyongereyeho Isonga aba amakipe 13, none muri uyu mwaka w’imikino 2012/2013 amarushanwa azaba arimo amakipe 14 kuko hiyongeyemo ikipe ya Espoir.

Amakipe yose uko ari 14 ni ikipe y’AMAGAJU, APR FC, AS KIGALI, ETINCELLES, ESPOIR, ISONGA, KIYOVU, LA JEUNESSE, MARINES MUHANGA, MUKURA, MUSANZE, POLICE, RAYON SPORTS.

Imikino ibanza izahuza amakipe mu mpera z’iki Cyumweru, ku munsi wa 1 ku itariki ya 22 Nzeri 2012 ikipe ya APR ifite igikombe cya shampiyona iheruka izacakirana na MARINES; umukino ukazabera kuri Stade Regional y’i Nyamirambo; naho POLICE na LA JEUNESSE ; umukino ukazabera Kicukiro; ETINCELLES na MUHANGA ; umukino ukazabere kuri stade Umuganda ; RAYON SPORTS n’AMAGAJU ; umukino ukazabera i Nyanza.

Ku itariki ya 23 Nzeri 2012 ho hateganyijwe imikino izahuza KIYOVU na ESPOIR ; umukino ukazabera ku Mumena, ISONGA na MUSANZE ; umukino ukabera Kicukiro ; MUKURA na AS KIGALI; umukino uzabera i Butare kuri Sitade Kamena.