Mu irushanwa ryo guhatanira igikombe cy’amakipe yabaye ayambere iwayo ku mugabane w’Afurika(Champions league), TP Mazembe yo muri Congo yanganyije na Espérance de Tunis yo muri Tuniziya ubusa ku busa mu mukino wa mbere wa ½ wabereye i Lubumbashi ku wa 7 Ukwakira 2012.

Nk’uko ikinyamakuru Okapi dukesha iyi nkuru, Mazembe yarangije umukino ifite abakinnyi 10 nyuma y’uko Stopila Sunzu yahawe ikarita itukura ku munota wa 85 kubera gukinira mugenzi we nabi.

Umukino waranzwe no gusatira bikomeye ku ruhande rwa Mazembe, ariko ba myugariri ba Esperance bababera ibamba.

Aya makipe yombi yaheruka guhurira muri iri rushanwa mu 2010, ubwo Mazembe yasezereraga Esperance iyitsina ibitego 5-0 mu mukino ubanza na 1-1 mu kwishyura.

Umukino wo kwishyura uteganyijwe kubera i Tunis muri Tuniziya ku wa 20 Ukwakira 2012.

Mazembe yo mu mujyi wa Lubumbashi muri Repuburika Iharanira Demukarasi ya Congo imaze gutwara igikombe cy’irushanwa ry’amakipe yabaye aya mbere iwayo ku mugabane w’Afurika inshuro 4 (mu 1967, 1968, 2009 no mu 2010) mu gihe Esperance Sportive de Tunis igitsindiye inshuro 2 gusa (mu 1994 na 2011).

Mu yindi mikino y’iri rushanwa Al Alhy yo mu Misiri yanganyije na Sunshine stars yo muri Nigeriya nayo yaguye miswi ku bitego bitatu kuri bitatu.

Irushanwa ry’amakipe yabaye aya mbere iwayo ku mugabane w’Afurika ryatangiye mu 1964, muri iki gihe ryitabirwa n’amakipe 52 ya mbere muri shampiyona y’i wabo mu bihugu bigize Ishyirahamwe ry’Umupira w’Amaguru muri Afurika ( CAF).