Amakipe abiri y’umupira w’amaguru akomeye ku mugabane w’u Burayi ya Real Madrid yo muri Espagne na Machester United yo mu Bwongereza, arahura mu mukino wa kimwe cy’umunani cy’irangiza mu marushanwa y’amakipe yabaye aya mbere iwayo UEFA Champions league.

Christiano Ronaldo araba akina n'ikipe azi neza

Uyu mukino ufatwa nk’udasanzwe kubera ubuhangange buzwi ku makipe yombi uraba kuri uyu wa gatatu tariki ya 13 Gashyantare 2013 muri Espagne, ukaza kuba ari umukino ubanza kuko hazaba undi wo kwishyura mu Bwongereza.

Bimwe mu biherwaho havugwa ko uyu mukino uba ukomeye

Bahoze bakinana ariko baraza kuba bahanganye

Nk’uko tubikesha urubuga goal.com, umukinnyi Christano Ronaldo wa Real Madrid arakina n’ikipe yigeze gukinamo imikino myinshi akanatwaramo ibikombe bitandukanye ku buryo yafatwaga nk’umukinnyi w’igitangaza.

Ubuhanga bwe ndetse buracyemezwa n’umutoza Ferguson utoza Manchester, kuko mu magambo yatangarije 20minutes yagize ati "Ronaldo ni umuhanga wa mbere ku isi hamwe na Messi. Akiri muri Manchester nari mbizi neza ko yari umwe mu bahanga muri ruhago, ubu rwose ari mu bihe bye byiza!”

Robin Van Persie ni intwaro ikomeye kuri Manchester United

Andi mateka atuma bahangana yubakiye ku mutoza Jose Mourinho wakunze guhangana n’ikipe ya Manchester United ubwo yatozaga ikipe ya Chelsea mu Bwongereza, abantu benshi bakaba bibaza uko aza kongera kwitwara imbere ya Ferguson.

Uyu mukino kandi Manchester United yarawiteguye bihagije, kuko ba myugariro Phil Jones na Jonny Evans bari barahawe ikiruhuko cyo kwitegura Real Madrid.