Mu gihugu cy’u Bwongereza uyu munsi birashyushye ku bakunda Premier League, aho ruraba rwambikanye kagati ya Chelsea na Arsenal, na none bikaza kuba bitoroshye hagati ya Tottenham na Manchester United.

Ikipe ya Chelsea iza gukina abasore bayo John Obi Mikel na Victor Moses batarimo kubera ko bari muri CAN ibera muri Afurika y’Epfo, na Oriol Romeu umaze igihe atagaragara mu kibuga, biteganyijwe ko Kapiteni wayo John Terry atabura muri uyu mukino.

Arsenal umukinnyi wayo wo hagati Laurent Koscielny araboneka muri uyu mukino nyuma yo kuva mu gihano cy’umukino umwe atagombaga gukina. Mikel Arteta na Tomas Rosicky baracyari mu mvune na ho Gervinho ari muri Afurika y’Epfo aho akinira ikipe y’igihugu cya Cote d’Ivoire mu mikino ya CAN 2013.

Abakurikiranira hafi umupira w’amaguru batangaza ko ikipe ya Chelsea bishobora kutayorohera gutsinda Arsenal, bitewe n’uko ngo mu minsi y’impera z’umwaka wa 2012, Chelsea ititwaye neza mu mikino yakiriye.
Chelsea iri ku mwanya wa gatatu n’amanota 42 na ho Arsenal ikaza ku wa gatandatu n’amanota 34. Umukino uratangira 13:30 GMT ni ukuvuga saa cyenda n’igice ku isaha yo mu Rwanda.

Ku rundi ruhande, saa kumi n’ebyiri ku isaha ya hano mu Rwanda ni ukuvuga saa kumi ku isaha yo mu Bwongereza, ikipe ya Tottenham iri ku mwanya wa kane n’amanota 40 irakira Manchester United iyoboye urutonde n’amanota 55.

Scott Parker umukinnyi wa Tottenham arakina mu mwanya wa Sandro, ikindi kandi ni uko iyi kipe idafite umukinnyi wayo Emmanuel Adebayor ubu uri muri Afurika y’Epfo mu mikino ya CAN.

Manchester United umukinnyi wayo Ashley Young aracyari mu mvune ariko icyuho cye kikazibwa na Nani. Jonny Evans aracyafite ikibazo cy’uburwayi ariko Rio Ferdinand na Nemanja Vidic bo bahagaze neza.

Abasesengura imikino bagaragaza ko bishobora kutorohera ikipe ya Tottenham iyo bagereranyije uko yakinnye na Arsenal, Chelsea, Everton na Manchester City ntishobore kuzicika.