Iri siganwa ryateguwe n’Ishyirahamwe ry’umukino wo gusiganwa mu modoka ku bufatanye na Banki ya Kigali, Prime Insurance, Kobil, Rwanda Events na Akarega Business Group, ryabereye mu turere twa Huye na Gisagara mu mpera z’icyumweru.

Ku wa Gatandatu tariki 23 Kamena, imodoka 17 zari zitabiriye, zasiganwe ibilometero 150,5 harimo uduce twabereye mu muhanda wa Rango- Gisagara ugera kuri Cathedral ya Butare banakinira mu wa Rango-Mbazi ku manywa naho mu masaha y’ijoro basubira mu wa Rango-Mbazi twegukanwa n’Abanya-Uganda, Kabega Moussa na Serwomu Rogers bakoresheje 1:33’25”.

Aba bagize ikipe yitwa ‘KG Rally Team’ batwara imodoka ya Mitsubishi Evo 9, bongeye kwigaragaza kuri iki Cyumweru mu duce dusoza mu muhanda wa Save- Shyanda aho bagombaga gusiganwa inshuro enye zireshya n’ibilometero 40 banikiye ikipe yari igizwe na Jonas Kansiime na Aaron Nsamba nabo bakomoka muri Uganda, basoza begukanye n’isiganwa ryose muri rusange.

Kabega Moussa na Rogers Serwomu bibaye ku nshuro ya kabiri begukanye iri siganwa riba rigamije no kwibuka Gakwaya Claude Sr wahoze ari umwe mu bakinnyi bakomeye b’uyu mukino mbere yo kwitaba Imana mu 1986 azize impanuka.

Abatuye i Huye no mu nkengero zaho, bongeye no kuryoherwa n’imyiyereko ya moto zihariye zitwarwa n’Abanya-Afurika y’Epfo babigize umwuga, ziguruka mu kirere zikaba zaherukaga mu 2016 ari nabwo zari zigeze mu Rwanda ku nshuro ya mbere.

Uko imodoka 10 zabashije gusoza zakurikiranye ku rutonde rusange

1. Kabega Musah/ Rogers Sirwomu (Uganda): Mitsubishi Evo 9: 05: 56’00”

2. Jonas Kansiime/ Aaron Nsamba (Uganda): Mitsubishi Evo 9: 05:57’00″

3. Giesen Jean Jean/ Dewalque Yannik (Rwanda) : Toyota Celica S : 06:07’00″

4. Imitiaz Din (Burundi) / Regis Karingirwa (Rwanda) : Toyota Avensis : 06:35’00’’

5. Remezo Christian/ Gahurazira Jean Marie (Burundi) : Toyota Celica : 06:55’00’’

6. Negomba Sadat/ Zubeda Abdallah (Uganda) : Toyota Runx : 07:17’00’’

7. Nagasha Graham/ Raymond Munyigwa (Uganda) :Subaru Impreza N8 : 07:50’00’’

8. Alain Gashi Murenzi / Faustin Kalibu (Rwanda) Toyota Curren : 07 :33’00’’

9. Mutuga Janvier/ Bukuru Hassan (Rwanda) : Buggy : 06:06’00’’

10. Balondemu Gilberto/ Waiswa Ibrahim (Uganda) : Toyota Corolla 2wd: 07:48’00’’

Amafoto: Ruhagoyacu