Mu mihanda ya Gashenyi, Tare na Karambo ni ho iri siganwa ryareshyaga n’ibilometero 72,2 ryanyuze, ahatangiye imodoka icyenda mu 10 byari biteganyijwe ko ari zo zitabira iri siganwa ryabaga ku nshuro ya kane kuva mu 2019.

Semana Genese na Dusingizimana bitabiriye ariko imodoka yabo ntiyabasha gusoza agace na kamwe muri iri siganwa ryari rigizwe n’uduce turindwi twakiniwe i Gashenyi inshuro eshatu, Karambo inshuro ebyiri na Tare inshuro ebyiri.

Agace ka gatatu kakiniwe ku Musozi wa Tare kasize Peugeot yari itwawe na Hakizimana Jacques na Semana Ish Kevin ivuyemo, naho Subaru Impreza yari itwawe na Gakwaya Eric na Kayibanda Aurore ndetse n’iya Murengezi Brian na Niwemugore, zombi ziviramo mu gace ka kane i Karambo.

Mu modoka eshanu zasoje, iyakoresheje ibihe byiza ni Mitsubishi Evo X yari itwawe na Giancarlo Davite ari kumwe na Matteo Davite, aho bakoresheje iminota 45 n’amasegonda 32.

Kanangire Christian na Mujiji Kevin bari muri Subaru Impreza, begukanye umwanya wa kabiri bakoresheje iminota 57 n’amasegonda icyenda, ibihe byiyongereye bitewe n’iminota itandatu bahanwe ku gace ka mbere nyuma yo gutinda guhaguruka.

Subaru Impreza yari itwawe na Yoto Fabrice akinana na Tuyishime Regis yasoreje ku mwanya wa kane nyuma yo gukoresha iminota 59 n’amasegonda ane.

Kalimpinya Queen na Ngabo Olivier, na bo bari batwaye Subaru Impreza, babaye aba kane bakoresheje isaha, iminota itatu n’amasegonda 34, ku mwanya wa gatanu hasoreza Rutabingwa Gratien na Munyaneza Irene bakoresheje isaha, iminota umunani n’amasegonda 39 muri Peugeot.

Rutabingwa Fernand wari uyoboye iri siganwa, yavuze ko mu byatumye imodoka nyinshi zitabasha gusoza isiganwa ari uko imihanda yari mibi, bikiyongeraho ko abapilote baba basabwa cyane kumvira ababafasha, babasomera ikarita.

Ati “Ni isiganwa ryasabaga tekinike nyinshi kurusha kwirukanka, ni isiganwa ryasabaga kumva ugusomera ikarita ‘co-pilote’ kuko hari harimo imihanda mibi.”

Shampiyona y’umukino wo gusiganwa mu mamodoka mu Rwanda izakomeza mu Ukwakira, hagati ya tariki ya 24 n’iya 25, hakinwa Huye Rally izabera mu Majyepfo.

Kayibanda Aurore wabaye Nyampinga w'u Rwanda mu 2012 na Kalimpinya Queen wabaye Igisonga cya Gatatu muri Miss Rwanda 2017, bahuriye mu isiganwa ndetse bifotozanya mbere yo gutangira gukina

Miss Kayibanda Aurore, Kalimpinya Queen na Niwemugore, bitabiriye "Nyirangarama Tare Sprint Rally 2025" yabereye mu Karere ka Rulindo ku wa 6 Nzeri

Umuraperi Ish Kevin (ibumoso) ari mu bamaze kumenyerwa mu mukino wo gusiganwa mu modoka

Yoto Fabrice wakinanye na Tuyishime Regis, yitegura kwinjira mu modoka

Isiganwa ryatangirijwe kuri Nyirangarama

Peugeot yari itwawe na Hakizimana Jacques ari kumwe na Ish Kevin ntiyabashije gusoza isiganwa

Abakunzi b'umukino wo gusiganwa mu modoka bareba uko zihaguruka kuri Nyirangarama

Giancarlo Davite wari utwaye imodoka ya Mitsubishi Evo X yongeye kwerekana ko afite ubuhanga bwihariye n'imodoka ishoboye

Kalimpinya Queen na Ngabo Olivier muri Subaru Impreza

Yoto Fabrice na Tuyishime Regis bazenguruka mu kibuga cyo ku Musozi wa Tare

Murengezi Brian na Niwemugore bazenguruka mu kibuga cyo ku Musozi wa Tare

Subaru Impreza yari itwawe na Kanangire Christian ukinana na Mujiji Kevin, basoreje ku mwanya wa kabiri

Giancarlo Davite na Matteo Davite bifotozanya nyuma yo kwegukana isiganwa

Yoto Fabrice asohoka mu modoka nyuma yo gusoza isiganwa

Rutabingwa Fernand wari uyoboye isiganwa, yambika umudali Ish Kevin

Murengezi Bryan na Niwemugore bashimirwa kwitabira Nyirangarama Rally ya 2025 nubwo batasoje isiganwa

Rutabingwa Gratien na Munyaneza Irene basoreje ku mwanya wa gatanu

Miss Kayibanda Aurore na Karasira Aurore na bo bashimiwe mu bakinnye iri siganwa

Kalimpinya Queen na Ngabo Olivier basoreje ku mwanya wa kane

Yoto Fabrice na Tuyishime Regis begukanye umwanya wa gatatu

Rutabingwa Gratien na Munyaneza Irene basoreje ku mwanya wa gatanu bahembwe kandi mu cyiciro cy'imodoka ikururira imbere n'inyuma

Kalimpinya Queen yahembwe kandi mu cyiciro cy'umupilote w'umugore witwaye neza mu isiganwa

Giancarlo Dvite yongeye gutegura igikombe cyo kwegukana Nyirangarama Rally yanatwaye iba ku nshuro ya mbere mu 2019

Tuyishime Regis na Yoto Fabrice bishimira umwanya wa gatatu begukanye

Kalimpinya Queen na Miss Aurore Kayibanda bifotozanya nyuma yo gusoza isiganwa

Kalimpinya Queen, Gakwaya Eric na Miss Aurore Kayibanda bishimiye gukina Nyirangarama Rally 2025

Amafoto: Kasiro Claude

Video: Byiringiro Innocent