00:00:00 IGIHE NETWORK KN KINYARWANDA EN ENGLISH FR FRANCAIS

Jeremy Giambi wakinnye muri MLB yitabye Imana

Yanditswe na Blaise Mukwende Nziza
Kuya 10 February 2022 saa 03:21
Yasuwe :

Jeremy Giambi wahoze akina muri Shampiyona y’umukino wa Baseball muri Amerika (Major League Baseball) yitabye Imana ku myaka 47 aho bikekwa ko yiyahuye.

Uhagarariye inyungu za Giambi, Joel Wolfe, yabwiye ikinyamakuru The Athletic ko yapfiriye mu rugo rw’ababyeyi be ruherereye i California muri Leta Zunze Ubumwe za Amerika.

Inzego z’ubuzima zahageze mbere zasanze yamaze gushiramo umwuka, hitabazwa polisi yatangaje ko Jeremy Giambi ashobora kuba yiyahuye. Yakomeje ivuga ko hagiye gukorwa isuzuma ku murambo we kugira ngo hamenyekana icyamuhitanye.

Jeremy Giambi wakinaga yugarira, yatangiye gukina muri Major League Baseball nyuma yo gutwara igikombe gikuru gihuza amashuri yisumbuye yose yo muri Leta Zunze Ubumwe za Amerika mu 1996.

Yanyuze mu makipe atandukanye yo muri MLB nka Kansas City Royals, Oakland Athletics, Philadelphia Phillies na Boston Red Sox mu myaka itandatu yamaze akina nk’uwabigize umwuga.

Kure Giambi yabashije kugera ni ubwo ikipe ye ya Oakland Athletics yahataniraga itike yo kugera ku mukino wa nyuma w’icyerekezo cy’iburasirazuba, ikaza gutsindwa na New York Yankees aho yari ahanganye n’ibihange nka Alex Rodriguez na Derek Jeter mu 2001.

Mu 2005, Giambi yabaye umwe mu batangabuhamya ku kirego cyaregaga ikigo cyitwaga Bay Area Labaratory Co-operative (BALCO) ko cyaba gitanga imiti yongerera abakinnyi bo muri MLB imbaraga.

Giambi yari afite mukuru we, Jason Giambi, bakinanye mu Ikipe ya Oakland Athletics.

Jeremy Giambi wakinnye muri MLB yitabye Imana afite imyaka 47

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .