Huye Rally itegurwa na Huye Motorsports Club ku bufatanye n’Ishyirahamwe Nyarwanda ry’Umukino wo Gusiganwa mu Modoka (Rwanda Automobile Club- RAC).

Iri siganwa ngarukamwaka ribera mu Ntara y’Amajyepfo, rigamije kwibuka no guha icyubahiro Gakwaya Claude wakinaga amasiganwa y’imodoka, witabye Imana mu 1986 azize impanuka.

Kuri iki Cyumweru, tariki ya 26 Ukwakira 2025, ni bwo hakinwe umunsi waryo wa kabiri ari na wo wa nyuma, aho habaye uduce tune twakiniwe mu mihanda ya Save-Shyanda na Shyanda-Save, ku ntera y’ibilometero 40.

Kanangire Christian na Rutabingwa Fernand bari basoje uduce umunani twa mbere bari imbere ku wa Gatandatu, bashimangiye umwanya wabo no kuri iki Cyumweru aho basoje isiganwa ryose bakoresheje isaha imwe, iminota 32 n’amasegonda 43 ku ntera y’ibilometero 139 byari bigize irushanwa.

Gakwaya Jean Claude na Mugabo Jean Claude bari batwaye iri rushanwa mu 2024, begukanye umwanya wa kabiri basizwe umunota n’amasegonda 33 naho Kalimpinya Queen na Ngabo Olivier bongera kwegukana umwanya wa gatatu basizwe iminota ine n’amasegonda atatu.

Rutabingwa Gratien na Munyaneza Irène bari batwaye Peugeot 106, basoreje ku mwanya wa kane, bakurikirwa na Hakizimana Jacques wakinanaga na Semana Ish Kevin na bo bari batwaye Peugeot 106.

Umunya-Uganda Kayira Faizal wakinanaga na Katumba Duncan begukanye umwanya wa gatandatu, Rutuku Mike na Gasarabwe Alain baba aba karindwi mu gihe Murengezi Bryan na Kevin Rusekuza babaye aba munani.

Huye Rally ya 2025 yari yiyandikishijemo imodoka 15, ariko 11 ni zo zitabiriye naho umunani aba ari zo zisoza. Subaru Impreza yari itwawe na Yoto Fabrice ari kumwe na Ruzindana Axel ni yo yavuye mu isiganwa kuri iki Cyumweru.

Biteganyijwe ko isiganwa rya nyuma muri uyu mwaka rizaba Rallye des Milles Collines izaba mu ntangiriro z’Ukuboza.

Uduce tune ni two twakinwe ku munsi wa nyuma wa Huye Rally 2025

Subaru Impreza yari itwawe na Mike Rutuku wakinanaga na Gasarabwe Alain

Abafana bari benshi ku muhanda

Murengezi Bryan na Kevin bakata i Save mu Karere ka Gisagara

Subaru Impreza yari itwawe na Kanangire Christian ari kumwe na Rutabingwa Fernand

Gakwaya Jean Claude na Mugabo Jean Claude begukanye umwanya wa kabiri

Kalimpinya Queen na Ngabo Olivier babaye aba gatatu mu isiganwa

Yoto Fabrice na Ruzindana Axel ntibasoje isiganwa ryo kuri iki Cyumweru

Peugeot 106 yari itwawe na Hakizimana Jacques na Semana Ish-Kevin

Abanya-Uganda Faizal Kayira na Duncan Katumba babaye aba gatandatu

Perezida w'Ishyirahamwe Nyarwanda ry'Umukino wo Gusiganwa mu Rwanda, Gakwaya Christian, yavuze ko bishimira uko Huye Rally 2025 yagenze

Meya w'Akarere ka Huye, Sebutege Ange, yavuze ko bazakomeza gushyigikira amasiganwa yo gusiganwa mu modoka abera muri aka Karere

Kalimpinya Queen na Ngabo Olivier begukanye umwanya wa gatatu

Gakwaya Jean Claude na Mugabo Jean Claude begukanye umwanya wa kabiri

Rutabingwa Fernand (ibumoso) na Kanangire Christian (iburyo) begukanye Huye Rally 2025

Rutabingwa Fernand na Kanangire Christian bashyikirizwa igikombe cy'iri rushanwa rya "Memorial Gakwaya"

Amafoto: Kwizera Remy Moses

Video: Byiringiro Innocent