Huye Rally itegurwa na Huye Motorsports Club ku bufatanye n’Ishyirahamwe Nyarwanda ry’Umukino wo Gusiganwa mu Modoka (Rwanda Automobile Club- RAC).

Iri siganwa ngarukamwaka ribera mu Ntara y’Amajyepfo, rigamije kwibuka no guha icyubahiro Gakwaya Claude wakinaga amasiganwa y’imodoka, witabye Imana mu 1986 azize impanuka.

📸𝐀𝐌𝐀𝐅𝐎𝐓𝐎📸

Ubwo abapilote bahatanye muri "Huye Rally 2025" biteguraga guhaguruka i Huye bajya gukinira mu mihanda yo mu Karere ka Gisagara ku Munsi wa Kabiri w'irushanwa.

📸:@remypixels pic.twitter.com/C0zIomJ1Sn

— IGIHE Sports (@IGIHESports) October 25, 2025

Nyuma yo gutangizwa ku mugoroba wo ku wa Gatanu, imodoka 11 zaryitabiriye zirimo 10 zo mu Rwanda n’imwe yo muri Uganda, zakinnye uduce umunani twari duteganyijwe ku wa Gatandatu aho twareshya n’ibilometero 127.

Ni uduce twakinwe nyuma y’umuganda wabaye mbere ya Saa Sita, abasiganwa bakoresha imihanda ya Gisagara-Kibilizi-Mugomba-Gisagara (1&2), Rango- Kibilizi (3&4), Kibilizi-Rango (5&6) na Rango-Kibilizi (7&8). Tumwe muri utu duce twa nyuma twakinwe mu ijoro.

Uyu munsi wa mbere wasize Kanangire Christian na Rutabingwa Fernand bari muri Subaru Impreza ari bo bayoboye aho bakoresheje isaha imwe, iminota irindwi n’amasegonda 57, barusha Gakwaya Jean Claude na Mugabo Jean Claude babakurikiye iminota ibiri n’amasegonda 45.

Ku mwanya wa gatatu hasoreje Kalimpinya Queen ukinana na Ngabo Olivier, bo basizwe iminota ibiri n’amasegonda 47 naho Yoto Fabrice na Ruzindana Axel baba aba kane.

Rutabingwa Gratien na Munyaneza Irène bari batwaye Peugeot 106 ndetse na Hakizimana Jack wari kumwe na Semana Ish Kevin muri Peugeot 106, basoreje ku mwanya wa gatanu n’uwa gatandatu.

Imodoka rukumbi yaturutse hanze y’u Rwanda itwawe n’Umunya-Uganda Kayira Faizal ukinana na Katumba Duncan, yasoreje ku mwanya wa karindwi, ikurikirwa n’iyari itwawe na Rutuku Mike na Gasarabwe Alain mu gihe ku mwanya wa cyenda hasoreje Murengenzi Brian na Kevin Rusekuza.

Imodoka ebyiri ni zo zitasoje umunsi wa mbere, aho iya mbere ari Subaru Impreza yari itwawe na Gakwaya Eric ari kumwe na Miss Kayibanda Aurore ndetse n’indi Subaru yari itwawe na Dusingizimana Salvator akinana na Kubwimana Emmanuel.

Kuri iki Cyumweru, tariki ya 26 Ukwakira, ni bwo hasozwa ‘Huye Rally 2025’ aho hakinwa agace ka cyenda n’aka 10 mu muhanda wa Save-Shyanda guhera saa Yine, mu gihe agace ka 11 n’aka 12 dukinirwa mu muhanda wa Shyanda-Save guhera Saa Sita. Biteganyijwe ko gusoza no gutanga ibihembo Saa Munani n’Igice z’amanywa.

Umunsi wa mbere wa Huye Rally 2025 watangiriye mu Karere ka Gisagara

Ubwo imodoka ziteguraga guhaguruka mu gace ka mbere ku wa Gatandatu

Subaru Impreza yari itwawe na Kalimpinya Queen ni yo yahagurutse mbere

Yoto Fabrice na Ruzindana Axel bitegura guhaguruka

Miss Kayibanda Aurore uri gukinana na Gakwaya Eric, yitabiriye amasiganwa ya Rally ku nshuro ya kabiri

Gakwaya Eric na Miss Kayibanda Aurore ntibasoje umunsi wa mbere

Rutuku Mike na Gasarabwe Alain bagize ikibazo cy'imodoka ariko babasha gusoza amasiganwa yose yari ateganyijwe ku wa Gatandatu

Umunya-Uganda Kayira Faizal ukinana na Katumba Duncan ni bo banyamahanga bitabiriye isiganwa ry'uyu mwaka

Abanya-Gisagara bishimiye kubona isiganwa ry'imodoka ryongera kubasanga iwabo

Gakwaya Jean Claude na Mugabo Jean Claude begukanye Huye Rally 2024, basoje umunsi wa mbere w'irushanwa rya 2025 bari ku mwanya wa kabiri

Hakizimana Jacques na Semana Ish-Kevin basoje umunsi wa mbere bari ku mwanya wa gatandatu

Kanangire Christian na Rutabingwa Fernand bari gukinisha Subaru Impreza, ni bo bayoboye umunsi wa mbere wa Huye Rally 2025

Peugeot 106 itwawe na Hakizimana Jacques na Semana Ish Kevin

Yoto Fabrice uri gukinana na Ruzindana Axel, basoje umunsi wa mbere bari ku mwanya wa kane

Uduce twa nyuma tw'isiganwa ku munsi wa mbere twakinwe mu masaha y'ijoro.

Hakizimana Jacques na Semana Ish-Kevin basoje umunsi wa mbere bari ku mwanya wa gatandatu

Amafoto: Kwizera Remy Moses