Disi Dieudonné wamamaye mu gusiganwa n’amaguru mu Rwanda yegukanye irushanwa ryo gusiganwa igice cya Marato mu Bufaransa, asize Umurusiya Andrey Safonov n’abandi benshi babigize umwuga ku cyumweru tariki ya 30 Ugushyingo 2014.

Iryo rushanwa mpuzamahanga ngarukamwaka ryo gusiganwa ibirometero 21, ryabereye mu Mujyi wa Fort de France, ryakinwaga ku nshuro yaryo ya 30, ryari ryitabiriwe n’abasiganwa bagera ku 12,000.

Disi Dieudonné w’imyaka 34, yaryegukanye nyuma yo kwiruka ibirometero 21 mu isaha imwe n’iminota 9 n’amasegonda 16 (1:09:16), asize Umurusiya Andrey Safonov basaga n’aho bahagereye rimwe, ariko akamusigaho ibyijana by’isegonda.

Aganira na IGIHE, Disi Dieudonné usanzwe ukinira ikipe ya Colonial yo mu Bufaransa, yatubwiye ibanga yakoresheje kugirango yegukane iryo rushanwa, dore ko benshi mu babigize umwuga batabashije kurirangiza kubera ubushyuhe bukabije.

Ati: “Bahagurutse bihuta, jye mbonye uko bihutaga mbona ko ninkomezanya na bo ntari burirangize. Nahise nigira inama yo kubareka bakagenda, ariko nyuma ya 15 (ibirometero 15) nari maze kugera ku mwanya 3, maze nkomeza kugenda mbanyuraho.”

Disi Dieudonne iburyo

Mu bo Disi Dieudonné yasize, harimo Umunyakenya Luke Kibet w’imyaka 31, ukina nk’uwabigize umwuga, akaba ari we wabaye uwa mbere ku isi mu gusiganwa Marato (ibirometero 42) mu mwaka w’2007.

Disi Dieudonné yahiriwe bidasanzwe n’uyu mwaka w’2014, kuko muri Nyakanga yegukanye umwanya wa 2 mu irushanwa ryitiriwe ubwigenge ryakinwaga ku nshuro ya 26 mu Bufaransa.

Muri Kamena yatsinze irushanwa ryo gusiganwa igice cya marato I Caen mu Bufaransa, bikurikira kuba yarabaye uwa 2 mu ry’i Carnival, iry’i Beauvais ndetse n’iryo muri Congo Brazzaville.

Mu mpera z’icyumweru gitaha Disi Dieudonné azasiganwa mu Mujyi wa Bridgetown mu birwa bya Barbados, na ho hashyuha cyane .

Mu Rwanda, Disi Dieudonne yaciye agahigo mu masiganwa , mu mwaka wa 2005 yegukanye irushanwa ryo gusiganwa metero 10,000 mu mikino ihuza ibihugu bikoresha ururimi rw’Igifaransa, yabereye i Niamey muri Niger, yongera no kwisubiza iryo rushanwa mu mwaka w’2009 i Beirut muri Lebanon.

Yanahagarariye u Rwanda mu mikino ihuza ibihugu bikoresha ururimi rw’Icyongereza (Glasgow Commonwealth Games) yabereye Osaka mu Buyapani mu mwaka w’2007, ndetse no mu mikino y’Isi yabereye i Berlin mu Budage.

Yegukanye uwanya wa 6 mu irushanwa ry’isi mu gusiganwa mu muhanda (World Road Running Championships) ryabereye i Rio de Janeiro muri Brazil mu mwaka w’2007.

Dore uko batanu ba mbere bakurikiranye mu irushanwa rya Fort de France ku cyumweru:

Dieudonné Disi 1:09:16

Andrey Safonov 1:09:16

Joel Martinez Tirado 1:10:38

Eddy Boulatte 1:12:29

Jose Rubiera 1:13:06