Ndayisenga Valens azitabira iri siganwa nk’umukinnyi w’ikipe y’ikigo cy’Ishyirahamwe ryo gusiganwa ku magare ku Isi azaba afatanyije na bagenzi bane barimo Ait El Abdia Anass, Godoy Ormenese Caio,Petrovski Andrej na Serech Oscar.

Iri siganwa rizakinwa ku nshuro ya 52 riratangirwa kuri uyu wa Kabiri basiganwa umuntu ku giti ku ntera ya Km 5,2, umwanya mwiza kuri Ndayisenga uherutse kuba uwa mbere mu Rwanda muri ubu bwoko bw’isiganwa.

Mu 2014 aka gace kari kegukanywe n’Umurusiya Rslanov Ildar akoresheje 13’57″.

Kuwa Gatatu, abasiganwa bazazenguruka umujyi wa Morillon ku ntera ya Km 151,3, ku munsi wa kabiri bazahaguruka Courmayeur berekeze Pont-Saint-Martin kuri Km 151,2.

Kuwa Gatanu uzaba ari umunsi ukomeye wa Km 162,3 basoreza ku gasongero k’umusozi wa m2000 bavuye Gressan bageze Valtournenche.

Isiganwa ryo ku munsi wa kane rizabera ahantu hatambitse ugereranyije n’iminsi yabanje kuko hose hari munsi y’ubutumburuke bwa m1000 nubwo hafite intera ya Km 152,2 kuva Pollein basoreze Saint-Christophe.

Tour de la Vallée D'aoste izasozwa ku Cyumweru abasiganwa bakore urugendo rwa Km 86 bavuye Pré-Saint-Didier bajya Colle Del Gran San Bernardo. Uru rugendo ruzasorezwa ku butumburuke bwa m2459.

Iri siganwa rizitabirwa n’amakipe 27 harimo ay’ibihugu nka Kazakhistan, u Busuwisi, Slovenia, Leta Zunze Ubumwe z’Amerika, Australia, u Burusiya na Norvege n’ay’ababigize umwuga nka BMC, Lotto Soudal na Movistar.

Umufaransa wegukanye iri siganwa mu 2009, Thibaut Pinot ukinira FDJ yegukanye igihembo cy’umunsi wa 8 muri Tour de France ya 2012.