Iki gikorwa ni cyo cyasoje inama y’Inteko Rusange ya FIA yaberaga mu Rwanda kuva tariki ya 10 kugeza ku ya 13 Ukuboza 2024, aho yari yahuriranye n’isabukuru y’imyaka 120 iri Shyirahamwe rimaze rishinzwe.

Ibirori byo byo gutanga Ibihembo bya FIA byitabiriwe n’abayobozi batandukanye barimo Perezida Paul Kagame n’Umuyobozi w’iri Shyirahamwe, Mohammed Ben Sulayem.

Umukuru w’Igihugu wari hamwe na Ben Sulayem, yatanze ibihembo bibiri bikomeye birimo icy’umukinnyi wahize abandi muri Formula One, cyahawe Max Verstappen watwaye iri rushanwa ku nshuro ya kane yikurikiranya, aho uyu mwaka yahigitse Lando Norris wabaye uwa kabiri na Charles Leclerc wabaye uwa gatatu.

Perezida Kagame kandi yashyikirije igihembo Umuyobozi Mukuru wa McLaren, Zak Brown, nk’ikipe nziza y’umwaka wa 2024, aho ari yo ibarizwamo Lando Norris ndetse na Oscar Piastri.

Muri rusange, hatanzwe ibihembo ku bitwaye neza mu byiciro 16 birimo Shampiyona y’Isi ya Karting, Rally-Raid, Formula 2, Rally, Formula E, Endurance na Rallycross.

Mu bandi bahembwe harimo Umufaransakazi Michèle Mouton wahawe igihembo cyiswe “Lifetime Award” na Perezida wa FIA, Mohammed Ben Sulayem, nyuma yo kumara imyaka 50 mu mukino wo gusiganwa mu modoka.

Uyu mugore w’imyaka 73, yakinnye uyu mukino kugeza mu 1986, ariko ubu yabaga mu gutegura amasiganwa.

Abayobozi batandukanye barimo Perezida Kagame bitabiriye itangwa ry'Ibihembo bya FIA muri BK Arena ku wa Gatanu

Umuyobozi wa FIA, Mohammed Ben Sulayem na Perezida Kagame bakurikiye itangwa ry'ibihembo

Abakinnyi bitwaye neza mu marushanwa atandukanye arimo Formula One bari babukereye

Umuholandi Max Verstappen akurikiye ibirori byo gutanga Ibihembo bya FIA muri BK Arena

Lando Norris yagize umwaka mwiza nubwo ategukanye Formula One

Charles Leclerc ni we wabaye uwa gatatu muri Formula One ya 2024

Perezida Kagame ashyikiriza Max Verstappen igihembo cy'umukinnyi wegukanye Formula One ya 2024

Verstappen yishimira igihembo yegukanye ubwo yari amaze kugishyikirizwa na Perezida Kagame

Umukuru w'Igihugu yatanze kandi igihembo cyegukanywe na McLaren nk'ikipe nziza y'umwaka w'imikino wa 2024 muri Formula One, aho hari hashize imyaka 26 itagitwara

Imodoka ya McLaren "MCL38", yakinishijwe na Lando Norris uyu mwaka, yazanywe ahatangiwe ibihembo muri BK Arena

Abahawe ibihembo bifotozanya n'abayobozi ubwo ibirori byari birangiye

Max Verstappen yifotozanya igihembo cya kane yegukanye nk'umukinnyi mwiza muri Formula One

Lando Norris, Max Verstappen na Charles Leclerc basoreje mu myanya itatu ya mbere muri Formula One uyu mwaka

Abari bahagarariye Ikipe ya McLaren i Kigali, bishimira igihembo begukanye