Hasozwa irushanwa ngarukamwaka ryo gusiganwa ku magare rya Criterium yabereye i Rwamagana, ryegukanwa na Ruhumuriza Abraham mu bagabo, mu bagore Girubuntu Jeanne d’Arc na we yegukana umwanya wa mbere.

Ku Cyumweru tariki ya 26 Gicurasi 2013, hakinwe umukino wo gusiganwa ku magare wateguwe n’Ishyirahamwe ry’Umukino w’Amagare mu Rwanda FERWACY.

Mu bagabo, Ruhumuriza Abraham wakoresheje igihe kingana n’amasaha abiri, iminota 49 n’isegonda rimwe (2h49’01’’), ni we wabaye uwa mbere n’umwaka ushize yari yegukanye iri rushanwa. Uwa kabiri aba Byukusenge Nathan n’igihe kingana n’amasaha ibiri, iminota 49 n’amasegonda abiri (2h49’02’’), uwa gatatu ni Ndayisenga Valens n’igihe kingana n’amasaha abiri, iminota 49 n’amasegonda atatu (2h49’03’’).

Mu bagore uwaje ku myana wa mbere ni Girubuntu Jeanne d’Arc wakoresheje igihe kingana na 2h06’00’’, uwa kabiri ni Niyonsaba Clementine n’igihe kingana na 2h10’31’’, uwa gatatu ni Uwimana Jeannte n’igihe kingana na 2h12’09’’.

Mu bagabo uwa mbere yahembwe amafaranga y’u Rwanda ibihumbi ijana (100.000Frw), uwa kabiri ahembwa mirongo inani (80.000Frw), uwa gatatu ahembwa mirongo itandatu (60.000Frw). Mu bakobwa uwa mbere yahembwe ibihumbi mirongo inani (80.000Frw), uwa kabiri ahembwa ibihumbi mirongo itandatu (60.000Frw), uwa gatatu ahabwa ibihumbi mirongo ine (40.000Frw).

Nyuma y’iri rushanwa ngarukamwaka rya Criterium ya Rwamagana 2013, hanafunguwe ku mugaragaro ishuri rizajya ryigirwamo umukino w’amagare i Rwamagana ryiswe “Adrien Niyoshuti Cycling Academy”.