Imikino y’igikombe cya Afurika muri Table Tennis, yatangiye ku cyumweru tariki ya 12 Gicurasi abakinyi 53 baturutse mu bihugu 16 bari bahuriye muri BK Arena bahatanira iri rushanwa rikinwa buri mwaka muri uyu mukino.

Nyuma y’imikino y’amajonjora na kimwe cya kane, kuri uyu wa kabiri tariki 14 Gicurasi 2024 hakinwaga imikino ya ½ n’imikino yanyuma, aho byarangiye umunya Nigeria Quadri Aruna, uza no ku mwanya wa mbere mu bari i Kigali, atsinze umunya Misiri Mohamed El- Beiali seti 4-0 4-0 (11-5, 11-6, 12-10, 11-3), ari na ko yegukana irushanwa yatsindiwemo ku mukino wanyuma muri 2018.

Mu bagore Dina Meshref wari waratsindiwe ku mukino wanyuma mu myaka ibiriishize, bigoranye yaje kwigaranzura mwene wabo Mariam Alhodaby ni ko gutsinda kuri M 4-3 yegukana iri rushanwa.

Iyi mikino ishojwe y’igikombe cya Afurika ikaba igiye gukurikirwa n’imikino yo gushaka itike yo gukina imikino Olimpike izatangira tariki ya 16 isozwe tariki ya 18 muri BK Arena.

Abakinnyi batandatu batatu mu bagabo na batatu mu bagore ni bo bazabona itike yo gukina imikino ya Paris aho izakinwa mu byiciro bitatu. Icyiciro cya mbere kizaba ari amajonjora y’ibanze aho abakinnyi batatu cyangwa bane bazajya mu matsinda maze babiri ba mbere bagakomeza mu cyiciro gikurikira cyo gukuranwamo.

Abazagera ku mukino wanyuma bazahita babona itike yo gukina imikino olimpike izabera i Paris mu gihe hazanakinwa umwanya wa gatatu kugira ngo hamenyekane uzegukana umwanya usigaye.

Kubera ko Misiri yo yarangije kubona itike, abakinnyi 26 mu bagabo na 24 mu bagore bazahatana ni abazava mu bihugu bya Algeria, Cameroon, Congo Brazzaville, Côte d’Ivoire, Djibouti, Ethiopia, Ghana, Kenya, Nigeria, Morocco, Madagascar, Ibirwa bya Maurice, Tunisia, Uganda, n’u Rwanda ruri mu rugo.

Abakunzi b'uyu mukino wa Table Tennis bari baje kureba aho igikombe cya Afurika cyerekeza

Imikino muri BK Arena izakomeza kuri uyu wa kane hakinwa guhatanira tike y'imikino olimpike

Abitwaye neza mu bagore bahembwe

Abitwaye neza mu bagabo na bo bahawe imidari

Dina Meshref nubundi warushaga abandi amanota ni we wegukanye igikombe

Quadri Aruna yashimangiye ubuhangange bwe yegukana igikombe cya Afurika