Abagabo 28 n’abagore 25 ni bo bari batangiye gukina iki gikombe cya Afurika kiri gukinwa umunsi wacyo wa gatatu i Kigali muri BK Arena, gusa kugeza ubu abagera ku munani ni bo bagiye gutangira gukina imikino yanyuma kuri uyu wa kabiri tariki 14 Gicurasi.

Mu bagore, abanya-Misiri batatu n’umunya-Nigeria umwe, baraba bahatanira umwanya wo ku mukino wa nyuma mu gihe mu bagabo imikino ya ½ iri buhuze n’ubundi abanya-Misiri babiri n’abanya-Nigeria babiri.

Umunyamisirikazi Dina Meshref urusha abandi amanota kuri ubu yaje gukuramo umunya-Cameroun, Sarah Hanffou muri ¼ aho muri ½ agiye guhura na Offiong Edem wo muri Nigeria. Undi mukino wo mu bagore, uri buhuze Hana Goda, umunya-Misiri ufite igikombe giheruka na mwenewabo Mariam Alhodaby.

Mu bagabo Omar Assar ufite irushanwa yaravunitse byatumye uyu mwaka hazagarara umukinnyi mushya uzaryegukana uzava hagati y’undi munya- Misiri Youssef Abdel-Aziz waraye atunguranye agasezerera numero ya kabiri ukomoka muri Algeria, Mehdi Bouloussa, aho muri ½ aza guhangana n’umunya-Nigeria Quadri Aruna uhabwa amahirwe.

Undi mukino Mohamed El-Beiali wo mu Misiri ari buhure na Olajide Omotayo wo muri Nigeria.

Imikino ya nyuma mu byiciro byombi ikaba iri bukinwe ku mugoroba wo kuri uyu wa Kabiri hamenyekana umukinnyi wegukanye igikombe cya Afurika muri Table Tennis aho abagerayo bazabona itike yo gukina igikombe cy’isi umwaka utaha wa 2025.

Iyi mikino y’igikombe cya Afurika nisozwa uyu munsi ikazakurikirwa n’imikino yo gushaka itike yo gukina imikino olimpike yo izatangira gukinirwa muri BK Arena kuva kuri uyu wa kane tariki 16 Gicurasi 2024.

Mohamed El-Beiali wo mu Misiri ari muri 1/2 cy'igikombe cya Afurika

Quadri Aruna wo muri Nigeria ni we uza imbere mu bagabo kuri ubu

Omotayo Olagide agiye kwisobanura n'umunya Misiri mukanya

Mohamed Youssef Abdelaziz yaraye atunguranye asezerera umunya-Algeria wahabwaga amahirwe

Edem Offiong ni we utari umunya-Misiri uri muri 1/2 mu bagore

Dina Meshref wo mu Misiri ni we urusha abandi amanota mu bagore

Hana Goda wo mu Misiri na we ari ku mukino wanyuma

Mariam Alhodaby na we akomoka mu Misiri