Imikino ya mbere muri iri rushanwa yabaye ku wa 12 Ukuboza 2022, ku bibuga mpuzamahanga biherereye muri IPRC Kigali.

Ni imikino iri gukinwa mu byiciro bitatu birimo Tennis y’abakina kinyamwuga, abakina bishimisha na Tennis y’abafite ubumuga (Wheelchair Tennis).

Imikino yabanje mu bakiri bato, Umunyarwanda Manishimwe Emmanuel yatsinze Umunya-Tanzania Charlie Jonson 6-3, 6-4, Emmy Mugisha atsindwa na Junior Chiruza wo Repubulika iharanira Demokarasi ya Congo (RDC) 6-3 na 6-0, naho Ishimwe Claude atsinda Moïse Ntabora na we wo muri RDC amanota 6-3, 3-6 na 6-2.

Imikino yakurikiyeho yahuje abakuze aho Hakizumwami Junior yatsinze Hamissi Sule Omar wo muri Tanzania 6-3, 6-3, Umurundi Ndayishimiye Aboubacar atsindwa na Muvunyi Yannick 6-2 na 6-3, Uwizeyimana Mathieu yatsinzwe Derrick Stanley Ominde wo muri Kenya 7-5 na 6-2 naho Albert John Njogu wo muri Kenya na we atsinda Tuyishime Fabrice 6-2 na 6-1.

Abakinnyi bahise bakomeza mu cyiciro gikurikiyeho harimo Abanyarwanda bane ari bo Manishimwe Emmanuel, Ishimwe Claude, Hakizumwami Junior na Uwizeyimana Mathieu.

Hakomeje kandi Abanya-Kenya babiri ari bo Albert John Njogu na Goodluck Shelemo. Abandi bakomeje ni Umunye-Congo Chiruza Junior n’Umurundi Ndayishimiye Aboubacar.

Muri iri rushanwa, umukinnyi wa mbere mu bagabo no mu bagore muri Tennis y’ababigize umwuga azahembwa 2,500 $ kuri buri umwe, mu gihe ibihembo byose bingana n’ibihumbi 30 $.

Ubwo iri rushanwa riheruka gukinwa mu 2019, Umunya-Kenya Isma Changawa ni we waryegukanye mu bagabo ndetse akaba ari no mu bazahatanira Rwanda Open 2022.

Icyo gihe yatsinze Kevin Cheriyot amaseti 2-0 (6-1na 6-2), mu gihe mu bagore ryatwawe na Ingabire Meghan atsinze Tuyisenge Olive amaseti 2-0 (6-1, 6-1).