Ndayisenga Valens yongeye kwegukana umwanya wa mbere bava i Rwamagana bajya i Musanze akoresheje amasaha 4 n’umunota n’amasegonda 11 ku ntera ya Km 151.5 ahita afata umwanya wa mbere rusange arusha Nsengimana Jean Bosco amasegonda 59’.

Kuva kuri Km 120, abasiganwa bari ku muvuduko rusange wa Km 490 ku isaha, Hadi Janvier wari wambaye umwenda w’umuhondo wari umaze umwanya mu gikundi cyari imbere arasigara.

Nyuma ya km 2 gusa, abasiganwa 18 binjiye muri icyo gikundi barimo Abanyarwanda Biziyaremye Joseph wa Kalisimbi, Nsengimana Jean Bosco (Kalisimbi), Byukusenge Patrick (Akagera), Ndayisenga (Kalisimbi), Bintunimana Emile (Akagera) na Ruhumuriza Abraham (Akagera).

Ndayisenga yaje kubasiga bose kuri Km 132 abasiga amasegonda 30”, agera kuri Km 145 yabasize umunota n’amasegonda 20.

Ndayisenga Valens yageze ku murongo arusha Umunya Eritrea, Mekseb Debesay wabaye uwa mbere i Kibungo amurusha umunota n’amasegonda 18, bakurikirwa na Biziyaremye Joseph banganya ibihe n’abandi 12 barimo Abanyarwanda Nsengimana Jean Bosco (6), Byukusenge Patrick (7), Bintunimana Emile (11), Ruhumuriza Abraham (15), Uwizeyimana Bonaventure (17) basize umunota n’amasegonda 30”.

Nyuma yo kwisubiza iri siganwa n’ibyishimo byinshi, Ndayisenga yavuze ko mu ijoro ryo kuri uyu wa Mbere yongeye kubona ababyeyi be yari amaze amezi abiri atabona baramusengera basaba ko yakongera kuritwara.

Yagize ati “ Icyangoye ni ubwoba natangiranyekubera umusore twari duhanganye watsinze ejo arakomeye ku rwego rw’Afurika naje kwiyumva kobishoboka ko bataturusha tekiniki. Narimenyereye imisozi miremire kuko ariho nitorezaga mu Buswisi.”

Ndayisenga yavuze ko yashimishijwe no kuba yabaye uwa mbere kuri uyu munsi wa kabiri ndetse akambara n’umwenda w’umuhondo ku nshuro ya mbere kuva atangiye gusiganwa ku magare.

Ku rutonde rusange, Ndayisenga Valens (Kalisimbi) ari imbere akoresheje amasaha 6 iminota 32 n’amasegonda 14’’, akurikiwe na Nsengimana Jean Bosco (Kalisimbi) arusha amasegonda 59.

Biziyaremye Joseph (Kalisimbi) ni uwa gatatu asizwe umunota n’amasegonda 3 akurikiwe na Mekseb Debesay banganya. Uwizeyimana Bonaventure (Kalisimbi) wa 8 niwe Munyarwanda wa kane usigaye mu 10 ba mbere ku rutonde rusange.

Hadi Janvier wari wegukanye agace kabanza ari ku mwanya wa 14 arushwa umunota n’amasegonda 17.

Kuri uyu wa Gatatu, abasiganwa barahaguruka i Musanze saa 8.30 berekeze i Muhanga baciye i Kigali ku ntera ya Km 127,5.

Aka gace karimo imisozi ifite ubutumburuke rusange bwa m 1874, biteganyijwe ko bazagera i Muhanga saa 11.57