Nkuko bisanzwe akarasisi ni kimwe mu biranga ibirori byo mu nzego z’umutekano.

Iyi mikino iri kuba ku nshuro ya kane, uyu mwaka yitabiriwe na Uganda, Sudani y’Epfo, Burundi, Ethiopie, Kenya, Sudani n’u Rwanda rwayakiriye ku nshuro ya mbere.

Ni umuhango witabiriwe n’abanyacyubahiro batandukanye barimo Minisitiri w’Umutekano, Gasana Alfred wari umushyitsi mukuru, Umuyobozi wa Polisi y’u Rwanda IGP Namuhoranye Félix, Umuyobozi wa Polisi Mpuzamahanga mu Karere, Gideon Kimilu, Umugaba Mukuru w’Ingabo z’u Rwanda, Gen Jean Bosco Kazura ndetse n’abandi.

Mu ijambo rye ry’ikaze Minisitiri Gasana yavuze ko iyi mikino ifasha abapolisi kwidagadura no gusabana.

Yagize ati “Intego y’imikino ni ukurwanya ibyaha byambukiranya imipaka ndetse no kurwanya imitwe y’iterabwoba muri aka karere. Ikindi kandi ni ugufasha abapolisi bacu kwidagadura no gusabana.”

Uretse akarasisi kanyuze benshi mu bari bitabiriye uyu muhango, ikindi ni Itorero Inganzongari ryasusurukije abari bateraniye muri Kigali Pelé Stadium binyuze mu kubyina imbyino gakondo za buri gihugu cyitabiriye.

Imikino ya mbere yafunguye iri rushanwa, Police FC ihagarariye igipolisi cy'u Rwanda yatsinze Rukinzo FC ihagarariye icy'u Burundi, ibitego 3-1 mu mupira w’amaguru.

Aya makipe kandi yongeye gucakirana muri Volleyball u Rwanda nabwo rutsinda ikipe y’u Burundi amaseti atatu ku busa.

Hari kandi imikino yo gusiganwa ku maguru, Iteramakofe, Kumasha, Kurasa, Basketball, Handball, Judo, Karate, Taekwondo na Netball.

EAPCCO ni umuryango ushinzwe kubahiriza amategeko, uhuza ibihugu 14 byo mu karere washinzwe mu 1998 hagamijwe guhuza imbaraga za Polisi mu gukemura ibibazo by’umutekano bishamikiye ku byaha ndengamipaka.

Imikino ni imwe mu bishyirwamo imbaraga n’ibihugu bigize uyu muryango hagamijwe guhuza inzego zishinzwe kubahiriza amategeko mu karere mu rwego rwo gushyira mu bikorwa intego zawo.

Ishami rya Polisi Mpuzamahanga (Interpol) mu Karere rifite icyicaro i Nairobi muri Kenya, rivuga ko siporo ifatwa nk’igikoresho cy’ingenzi mu guhanahana amakuru no kurwanya ibyaha.

Amafoto: Ntare Julius na Shumbusho Djasiri