Abakinnyi bazatwara iyi ‘Grand Slam’ ya mbere mu mwaka, mu bagabo n’abagore bakina ari umwe, bazabona miliyoni 2,79$ (miliyari 4,05 Frw).

Mu mwaka ushize, abatwaye iri rushanwa ni Jannik Sinner mu bagabo na Madison Keys mu bagore aho buri wese yahawe miliyoni 3,5 z'Amadolari ya Australia (miliyari 3,4 Frw).

Umuyobozi Mukuru ushinzwe Tennis muri Australia, Craig Tiley, yagize ati “Kongeraho 16% bigaragaza ubushake bwacu mu gushyigikira iterambere rya Tennis kuri buri rwego. Mu 2023 twongereyeho 55% kugira ngo bigirire akamaro abakinnyi.”

Mu mwaka ushize US Open ni yo ‘Grand Slam’ yatanze amafaranga menshi y’ibihembo angana na miliyoni 90$ (miliyari 130,8 Frw), Wimbledon itanga miliyoni 72,49$ (miliyari 105,2 Frw) naho French Open itanga miliyoni 66,12$ (miliyari 96,4 Frw).

Muri Australian Open iteganyijwe kuva tariki ya 18 Mutarama kugeza ku ya 1 Gashyantare 2026, abakinnyi bazaviramo mu ijonjora rya mbere bazatahana ibihumbi 150 by’Amadolari ya Australia (miliyoni 146,2 Frw), yiyongereyeho 14% ugereranyije n’aya 2025.