Ishyirahamwe ry’umukino wo gusiganwa ku maguru ryashyikirijwe inkunga ya miliyoni esheshatu na World Vision yo gushyigikira isiganwa rya Marathon
y’amahoro ry’ibirometero 21, rizitabitabirwa n’ibihugu 35 ku Cyumweru, i Kigali.

Ku nshuro ya cyenda, kuri tariki ya 9 Gicurasi, nibwo i Kigali hazabera irushanwa ryo gusiganwa ku maguru ry’ibilometeri 21, muri malato no muri kimwe cya kabiri cya malato (Demi malaton).

Bimwe mu bihugu 35 bizaryitabira, harimo Kenya, Uganda, Tanzania, Denmark, Canada, Koreya y’Amajyepfo, Amerika, Ubwongereza, n’ibindi dore ko ngo hamaze kwiyandikisha abarenga 300 nk’abazaryitabira.

Iyi malato mpuzamahanga nk’igamije gutambutsa ubutumwa bwo gusakaza amahoro mu batuye Isi, World Vision yayiteye inkunga ya miliyoni 6 z’amafaranga y’u Rwanda, inatanga imipira 300 izambarwa n’abazasiganwa, dore ko ari nayo muterankunga mukuru w’iri rushanwa nk’uko Umuyobozi wa World Vision George Gitau yabitangaje.

George Gitau ati “Ntitwifuza guhora twumva intambara n’ibibazo by’urudaca mu batuye Isi, turifuza ko amahoro aganza binyuze mu nzira zitandukanye zirimo n’imikino nk’iyi mpuzamahanga.”

Rukundo Johnson wari umwe mu bahagarariye iri shyirahamwe, yatangaje uko ibihembo byifashe ati “Uwa mbere mu bakobwa no mu bahungu muri malato azahembwa miliyoni imwe n’ibihumbi magana atandatu, muri demi malato uwa mbere ku mpande zombi ahembwe miliyoni”.

Akomeza anavuga ko basanzwe banakorana n’abandi baterankunga nka Inyange, Sulfo n’abandi batandukanye.

Mu irushanwa ry’umwaka ushize, Abanyakenya nibo begukanye imidari ya mbere, Abanyarwanda baba aba kabiri.