Umunyamerikakazi ukina Tenis, Serena Williams, yegukanye igikombe mu bagore mu irushanwa US Open atsinze Umunyabelarusikazi Victoria Azarenka ku mukino wa nyuma wabaye kuri iki Cyumweru tariki 9 Nzeri 2012.

Williams w’imyaka 30 nimero ya 4 ku Isi muri Tenis yatsinze Victoria nimero ya 1 ku Isi amaseti 6-2, 2-6, 7-5 mu mukino wamaze amasaha 2 n’iminota 18. Uyu mukino wa nyuma ukaba ariwo wabaye muremure muri za finali za US Open kuva mu 1981.

Ubu ni ku nshuro ya kane Williams yegukana ikikombe cya US Open nyuma y’ 1999, 2002 n’ 2008.

Serena yavuze ko yishimye cyane bityo bimugoye kugira icyo atangaza gusa ngo Victoria yakinnye neza cyane.

Mu marira menshi Victoria yatangaje ko Serena akwiye koko iki gikombe ariko yongera ho ko ntacyo yicuza kuko yakoze ibishoboka byose bikananirana.

Amakuru dukesha urubuga rwa interineti 7sur7.be, avuga ko igikombe yahawe cyaherekejwe n’igihembo cy’Amadorari y’Amerika angina na miliyoni 1,9.

Iyi nsinzi ya Wiliams ntacyo ihindura ku rutonde rw’abakinnyi beza muri Tenis kuko yagumye ku mwanya wa 4, Victoria akaguma ku wa mbere.

Serena Williams w’imyaka 30 ni umwe mu bakinnyi bakomeye ba Tennis
ku Isi, umuvandimwe we Venus Williams nawe arazwi cyane muri uyu mukino dore ko yigeze kuba nimwero ya mbere ku Isi muri 2007, ariko ubu ari ku mwanya wa 35.