Iki gikorwa cyabereye muri iri shuri riri i Ntarama, cyari cyitabiriwe n’abana bose baryigamo, abayobozi b’ishuri ndetse n’ababyeyi b’abana bakoze ibizamini bibazamura mu ntera mu mukino wa Karate.

Mu bana 45 bakoze ibizamini byo kubazamura mu ntera, 27 batsindiye kuzamuka ku mukandara w’umuhondo, 13 batsindira uwa Orange uwukurikira, mu gihe batanu babonye uw’icyatsi.

Ubusanzwe, imikandara ya Karate ihera ku mweru, umuhondo, orange, icyatsi, ubururu n’ikigina kugeza ku mukara uba ufite ibyiciro bitandukanye bizwi nka “Dan”.

Umuyobozi wa The Champions Sports Academy, Nkuranyabahizi Noël, usanzwe utoza Ikipe y’Igihugu ya Karate, yashimiye ababyeyi baherekeje abana babo muri aya marushanwa mu gihe kandi yemeje ko urwego rwabo rwazamutse. Yashimiye kandi ubuyobozi bw’iri shuri n’ubwa Gasore Serge Foundation.

The Champions Sports Academy isanzwe ifite amashami arimo irikorera i Remera ahazwi nka Sports View, i Nyanza mu Majyepfo, Rusororo muri City Infant and School, muri Gasore Serge Foundation na Lycée Notre Dame de Cîteaux.

The Champions Sports Academy yatangiye ibikorwa byayo mu 2017 yibanda kuri Karate gusa, nyuma igenda ibyagura mu rwego rwo kwegereza siporo abana, haba mu gihe cy’ibiruhuko ndetse n’igihe batagiye ku mashuri, mu gukomeza gushakisha impano no kuzishyigikira.

Abana bakina imikino itandukanye irimo Karate, Badminton, Sports Chanbara, Imikino Ngororangingo “Gymnastics”, kubyina bya Kinyarwanda ndetse hakaba hari na gahunda yo kongeramo indi mikino nk’umupira w’amaguru.

The Champions Sports Academy ifite ishami muri Gasore Serge Foundation i Ntarama

Umuyobozi wa The Champions Sports Academy, Nkuranyabahizi Noël, asanzwe atoza Ikipe y'Igihugu ya Karate

Ababyeyi bari bitabiriye izamurwa mu ntera ry'abana babo bamaze iminsi biga Karate

Abana 45 ni bo bakoze ibizamini byo kubazamura mu ntera mu mukino wa Karate

Abanyeshuri bo muri Gasore Serge Foundation bari bitabiriye iki gikorwa

Abanyeshuri bo muri Gasore Serge Foundation bari bitabiriye iki gikorwa

Bamwe mu bashyitsi bari baje gusura iri shuri bavuye muri Amerika, bakurikiye igikorwa cyo kuzamura mu ntera abana biga Karate

Umuyobozi wa Gasore Serge Foundation

Umuyobozi w'Ishuri rya Gasore Serge Foundation ari kumwe na Nkuranyabahizi Noël washinze The Champions Sports Academy