Kuri iki Cyumweru tariki 20 Mutarama 2019 habaye ‘Kigali Car Free Day’ ya mbere y’umwaka wa 2019 aho abayitegura barimo umutoza Nelson Mukasa bakoresheje imyitozo abantu bo mu byiciro bitandukanye, abakuze n’abato.

Abakoze imyitozo barimo abakinnyi b’ishuri ry’umupira w’amaguru rya Ferwafa, Isonga Football Academy bakanguriwe gukomeza kwirinda indwara zitandura n’Umuyobozi w’Umujyi wa Kigali Rwakazina Marie Chantal.

Nyuma y’imyitozo uyu muyobozi yagize ati “Umwaka wa 2019 tuzongera imbaraga mu gukangurira abatuye Umujyi kwitabira Siporo ya bose kuko bituma hari indwara birinda zitandura kandi zidafata abakuze gusa nkuko benshi babikeka.”

Imyitozo ngororamubiri yatangiye saa moya irangira saa yine, yasojwe abayitabiriye bapimwa indwara zirimo umuvuduko w’amaraso, umubyibuho ukabije.
Car Free Day yatangiye tariki 29 Gicurasi 2016. Ni igikorwa kigamije gufasha abanyarwanda gukora siporo baharanira ubuzima bwiza.

Amafoto: Ntare Julius