Aya marushanwa yari amaze iminsi 21 abera muri Maroc yitabiriwe n’ibihugu 14 byo ku Mugabane wa Afurika. Ni inshuro ya mbere yitabiriwe n’Umunyarwanda.

Bimwe mu byiciro byari muri iri rushanwa, birimo kurwana (Sanda), gutera icumu (Quiang Shu), kwiyerekana hakoreshejwe inkoni (Gunshu), kwigaragaza hakoreshejwe icumu (Nandao), gukoresha inkota (Dao Shu) no kurwana mu matsinda y’abantu batatu kuri batatu.

Ndagijimana yatsinze mu byiciro bibiri aribyo imirwano ya batatu kuri batatu ndetse no kurwana (Sanda).

Nyuma yo kwegukana igikombe, Ndagijimana yavuze ko yishimiye guhesha ishema igihugu.

Ati “Ni amarushanwa yari agoye cyane kuko yarimo abantu bo mu bihugu bitandukanye gusa nishimira uko nitwaye nkahesha ishema igihugu.”

“Muri rusange nakinnye mu byiciro bitandukanye bateranyije amanota basanga nabaye uwa mbere nk’urukirwa n’Umunya-Côte d’Ivoire.”

Ndagijimana avuga ko kwegukana iki gikombe byamwongereye icyizere ndetse yumva agiye gushyiramo imbaraga kugira ngo federasiyo ibone ubuzima gatozi.

Ati “Ni ibintu byiza cyane kuko bitanga icyizere ko abanyarwanda dushoboye. Uyu mukino ni mushya mu Rwanda bityo turasaba ubufasha kugira ngo tubone uko natwe twabona Federasiyo.”

Ni ku nshuro ya mbere iri rushanwa ryegukanywe n’umukinnyi ukomoka mu bihugu byo mu munsi y’ubutayu bwa Sahara.

Ndagijimana yakiriwe na benshi mu babyeyi asanzwe akoresha siporo mur gym

Ndagijimana Emile yatangaje ko afite inyota yo kuzamura uyu mukino mu Rwanda

Ndagijimana yatahukanye ibikombe bibiri n'umudali

Ubwo Ndagijimana Emile yageraga ku kibuga cy'indege