Umunyarwanda Disi Dieudonné ukina umukino wo gusiganwa ku maguru, kuwa Mbere ku itariki 8 Ukwakira 2012 yatsindiye umudari mu irushanwa Sedan-Charleville mu Bufaransa.

Disi Dieudonné w’imyaka 32, yari amaze imyaka ibiri ahagaritse gukina kubera imvune, yabashije gutsinda irushanwa akoresheje isahaimwe, iminota 40 n’amasegonda icyenda.

Nk’ uko tubikesha The Newtimes, Disi yatangarije Times Sports ko atunguwe n’ iyo nsinzi y’umudari wo kwiruka mu ’irushanwa ry’intera ndende, ibirometero 20, kuko yaherukaga gukora ku mudari mu irushanwa rya Marseille-Cassis mu 2009, byaje gukurikirwa n’ imvune zitandukanye.

Dieudonné akimara kuvunika, atangaza ko n’ubwo yazaga gukora muri Komite y’imikino ngororamubiri mu Rwanda, yari azi ko umwuga we utazawukomeza, ariko umutoza we agakomeza kumushishikariza kongera gukina.

Si umudari gusa ahubwo yongerewe ho igihembo cy’ Amayero ibihumbi 9 na tike y’ubuntu y’indege.

Disi Dieudonné yavutse kuwa 24 Ugushyingo 1980 mu majyepfo y’u Rwanda yitabiriye amarushanwa atandukanye haba ubwe ku giti cye, cyangwa ahagarariye u Rwanda.

Mu 2005 yabaye uwa 3 muri metero 5000, aba uwa mbere muri metero 10 000 mu irushanwa ry’ibihugu bivuga Igifaransa ryabereye muri Niger. Mu 2009 aba uwa mbere mu Bufaransa muri metero 5 000 no mu Libani muri metero 10 000.