Byatangajwe ku wa 8 Gashyantare 2026, ubwo hasozwaga amarushanwa y’iminsi itatu y’abana b’abakobwa n’abahungu batarengeje imyaka 17 agamije kureba urwego bagezeho mu mukino wa Volleyball, yabereye mu Karere ka Nyanza, muri Collège du Christ-Roi.

Ngarambe yabwiye aba bana ko iki ari igihe cyiza cyo kumenya amahirwe bahawe n’igihugu, bakibuka ko kumenya umukino muri iki gihe byarenze kuba ibyo kugira ubuzima bwiza gusa, ahubwo binazana amafaranga.

Ati ‘‘Mukunde imikino kuko ubu nka Volleyball yabaye ubucuruzi. Hari abakinnyi b’Abanyarwanda bahembwa ibihumbi 3$ [arenga miliyoni 4 Frw] ku kwezi babikesha gukina Volleyball. Nimukomeze urukundo rwa Volleyball, tuyizamure ku rwego mpuzamahanga, kandi umusaruro ntimuzatinda kuwubona.’’

Yakomeje kandi abasaba aba bana gukomeza kurangwa n’ikinyabupfura, kugira ngo bazagere kure mu mikino, bakomeze kuzamura ishema ry’u Rwanda ruri kubarera.

Mupenda Nshuti Christian umaze imyaka ibiri akina Volleyball muri iyi gahunda y’Isonga, ni umwe bamaze gusarura ku mbuto zayo kuko mu 2025 yasohokeye u Rwanda mu Misiri.

Yasangije barumuna be uburyo yahagarariye igihugu bikamutera ishema, ahamya ko yiteguye gukomeza gukina Volleyball kugira ngo azagere kure muri uyu mukino.

Rugwiro Aimé Arcade wiga kuri Collège du Christ-Roi, yagaragaje ko amahirwe igihugu cyabahaye batazayatesha agaciro kuko kuba muri gahunda y’Isonga bibubakamo urukundo rw’umukino bya nyabyo.

Ati ‘‘Niteze ko mu bihe biri imbere nazajya mu ikipe y’igihugu kuko maze kumenya tekinike za Volleyball, maze uyu mukino ukaba akazi kanjye mu bihe bizaza.’’

Iri terambere rinabonwa n’inzobere mu mikino zirimo n’abatoza nka Hatungimana Jean Claude, utoza Volleyball, wavuze ko ‘‘iyi gahunda ifasha mu kubaka umukinnyi, aho Isonga ifasha mu kubonera abana imipira yo gukina, iyo kwambara, ibibuga, inkweto zo gukinisha, kandi ibi ni bifasha abana cyane, bigatuma za mpano zizamuka.’’

Umukozi ushinzwe Imishinga irimo n’Isonga Program muri Minisiteri ya Siporo, Dr. Niyonsenga Clairon, yavuze ko hari gahunda yo kuzamura umubare w’abagerwaho n’ibyiza by’iyi gahunda, aho mu cyiciro cya kabiri cy’uyu mushinga kizagera ku bana basaga 2700 mu mikino itandatu irimo Umupira w’amaguru, Basketball, Handball, Volleyball, Imikino Ngororamubiri, amagare n’Imikino y’abafite ubumuga.

Dr. Niyonsenga yanavuze ko “muri Volleyball, haziyongeraho kuvugurura ibibuga, aho vuba aha ibibuga byose bizajya bishyirwamo itapi ituma abakinnyi badakomereka ukundi igihe bakina, byose bigamije iterambere ry’uyu mukino.’’

Ibi kandi bijyana no gutoza abasifuzi bakiri bato kugira ngo na bo bakure bafite ubumenyi muri uyu mukino, bityo inguni zose ziyubake.

Aya marushanwa yasojwe ikipe ya Collège Christ-Roi Nyanza mu bahungu itsinze iya GSO Butare, naho GS St Aloys y’i Rwamagana mu bakobwa itsinda ESB Kamonyi.

Isonga Programme yitezweho kuzamura impano n'ahazaza h'imikino myinshi mu Rwanda

Abana bagize umwanya wo guhiganwa bagaragaza impano zabo n'urwego bagezeho muri Volleyball

Gahunda y'Isonga ishimwa kuba itarirengagije n'umwana w'umukobwa

ESSF Shangi yo muri Nyamasheke yahataniraga umwanya wa gatatu na GS St Joseph Kabgayi muri Muhanga (yambaye umweru) mu bakobwa

Ikipe ya Seminari Nto ya Karubanda na yo yari yatumiwe muri iri rushanwa gufasha amakipe ari mu Isonga kwipima urwego agezeho, yatwaye umwanya wa gatatu

Muri iri rushanwa, ishyaka ryari ryose

Ikipe ya GS St Aloys y'i Rwamagana ni yo yatsinze mu bakobwa, kapiteni wayo ashyikirizwa igikombe

Ikipe ya GS St Aloys Rwamagana y'abakobwa yifotozanya n'abayobozi nyuma yo guhabwa igikombe

Mupenda Nshuti Christian w'imyaka 19 (uri iburyo), yashishikarije bagenzi be bakina Volleyball gukomeza kuyikunda, ababwira ko uyu mukino watangiye kumwuriza indege ajya mu mahanga

Ikipe ya Collège du Christ Roi ni yo yegukanye iri rushanwa mu bahungu batarengeje imyaka 17

Umuyobozi w'Imishinga muri Minisiteri ya Siporo, Dr. Niyonsenga Clairon, yavuze ko ibibuga bya Volleyball bikinirwaho muri iyi gahunda byose bizashyirwamo tapi, kugira ngo byorohere abakinnyi kwirinda gukomereka bakina

Abana basaga 160 ni bo bitabiriye iyi gahunda aho barimo kandi abitoza gusifura n'ubutabazi bw'ibanze