00:00:00 IGIHE NETWORK KN KINYARWANDA EN ENGLISH FR FRANCAIS

Abazitabira irushanwa rya Beach Volleyball muri Qatar bemerewe kwambara bikini

Yanditswe na Bukuru JC
Kuya 25 Gashyantare 2021 saa 09:25
Yasuwe :
0 0

Nyuma y’uko hari abakinnyi bagaragaje ko batazitabira irushanwa ryo ku rwego rw’Isi rya “Beach Volleyball Word Tour” rizabera muri Qatar kubera imyambarire bategetswe, abaritegura bisubiyeho babemerera gukina bambaye bikini.

Iri rushanwa rya Volleyball ikinirwa ku mucanga riri ku rwego rw’inyenyeri enye, rizabera ku mucanga wa Katara i Doha muri Qatar hagati ya tariki ya 8 n’iya 12 Werurwe 2021.

Abaritegura bari bamenyesheje abakinnyi bazaryitabira ko mu mabwiriza bazagenderaho harimo ko “Amakipe yose y’abagore azitabira azajya yambara imipira y’amaboko magufi […] ndetse azajya yambara amakabutura maremare ageze ku mavi.”

Gusa, ayo mabwiriza yahinduwe ku wa Kabiri w’iki cyumweru nyuma y’uko Karla Borger na Julia Sude bo mu Budage, hamwe n’umutoza wabo, bavuze ko batazitabira iri rushanwa bagaragaza ko babangamiwe n’iryo tegeko rishingiye ku “kubaha umuco n’imigenzo y’igihugu cyakirikiye irushanwa".

Borger yagize ati “Tuzaba tugiye mu kazi kacu ariko bari kutubuza kuzambara imyambaro yacu y’akazi. Iki ni cyo gihugu cyonyine n’irushanwa ryonyine aho guverinoma itubwira uburyo dukoramo akazi kacu. Twabinenze.”

Uyu mugore wigeze gutwara umudali wa Feza ku rwego rw’Isi, yavuze ko atiyumvisha uburyo Ishyirahamwe Mpuzamahanga rya Volleyball (FIVB) ryahisemo igihugu kizakira irushanwa kandi kitemerera abakinnyi kwambara bikini mu gihe cy’ubushyuhe.

Yakomeje agir ati “Turi kubaza impamvu ari ngombwa ko irushanwa ryabera hariya.”

FIVB yavuze ko “Yemera idashidikanya ko Beach Volleyball y’abagore, kimwe n’indi mikino yose, igomba kureberwa mu ndorerwamo y’uburyo abakinnyi bitwaye mu kibuga, aho kureba uko bambaye.”

Yakomeje igira iti “Ku bw’ibyo, mu gihe hazaba hari kuba irushanwa i Doha, abakinnyi nibasaba kwambara imyambaro yabo isanzwe bazaba babyemerewe.”

Umutoza w’ikipe y’u Budage y’abagore, Helke Claasen, yari yafashe icyemezo cyo kutajya muri Qatar nk’uko umuyobozi wa siporo mu ishyirahamwe rya Volleyball muri icyo gihugu, Niclas Hildebrand, yabibwiye ikinyamakuru Suddeutsche .

Ati “Yambwiye ko atazajyayo (muri Qatar) kuko yumva ko yaba atubashywe nk’umugore.”

Mu myaka 10 ishize, Qatar yakiriye amarushanwa menshi y’imikino itandukanye nubwo amategeko yayo anengwa kubangamira uburenganzira bw’ikiremwamuntu, kuba nta burambe ifite mu gutegura amarushanwa ya siporo ndetse hakaba ubushyuhe bwinshi.

Ubwo yakiraga Shampiyona y’Isi y’imikino ngororamubiri i Doha mu 2019, abakinnyi b’abagore basiganwa ku maguru bemerewe kwambara uko bifuza. Ibi byabaye kandi no mu mikino ya ANOC World Beach Games yabaye muri uwo mwaka, abagore bemererwa kwambara bikini.

Karla Borger (2) na Julia Sude (1) bagaragaje kutishimira icyemezo cyo kubuzwa kwambara bikini muri Qatar
Abagore bakina Beach Volleyball bambara uyu mwambaro uzwi nka bikini
Kimwe mu byinubiwe n'abakinnyi babujijwe kwambara bikini ni ubushyuhe buba muri Qatar
FIVB yatangaje ko abashaka kwambara bikini bazaba babyemerewe mu irushanwa rizabera i Doha mu kwezi gutaha

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .