Shampiyona ya Volleyball isanzwe y’uyu mwaka yarangiye Gisagara VC iyoboye urutonde ikurikirwa na REG VC, UTB VC na APR FC ziza ku mwanya wa gatatu n’uwa kane.

Nk’uko amategeko y’iyi shampiyona abiteganya, aya niyo makipe akomeza mu gice cya kabiri cya “Playoffs” aho iyabaye iya mbere ihura n’iyabaye iya gatatu, iya kabiri ikisobanura n’iyabaye iya kane zitanguranwa gutsinda imikino ibiri, ibikoze ikajya ku mukino wa nyuma utanga igikombe.

REG VC yahuye na UTB VC iyitsinda imikino ibiri, ikatisha itike yo kujya ku mukino wa nyuma, urugamba rukomeye ruri hagati ya Gisagara VC na APR VC zatsindanye umukino umwe kuri buri ruhande zikaba zigomba kwisobanura mu wa kamarampaka wa gatatu.

Biteganyijwe ko uyu mukino ugomba kubera ku kibuga cy’i Gisagara kuri uyu wa Gatandatu tariki 19 Gicurasi 2018 izawutsinda izahita yerekeza ku mukino wa nyuma ihasanze REG VC zikazahanganira igikombe cy’uyu mwaka tariki 25 Gicurasi.