Iyi shampiyona yashyizweho akadomo ku Cyumweru, tariki ya 1 Werurwe 2026, aho imikino ya nyuma mu byiciro byombi; abahungu n’abakobwa, yose yabereye muri Petit Stade i Remera.

Mu cyiciro cy’abakobwa, GS St Aloys y’i Rwamagana yegukanye igikombe nyuma yo gutsinda ikipe ya Ecole Sainte Bernadette de Kamonyi amaseti 3-0 (25-23, 25-19, 25-23) ku mukino wa nyuma, biba ku nshuro ya gatatu yegukanye iri rushanwa yikurikiranya.

Ni mu gihe ikipe ya Lycée de Nyanza yegukanye umwanya wa gatatu nyuma yo gutsinda ikipe ya St Joseph y’i Kabgayi.

Mu cyiciro cy’abahungu, Gisagara Volleyball Academy yegukanye igikombe itsinze ku mukino wa nyuma ikipe ya Petit Séminaire Virgo Fidelis amaseti 3-1 (25-16, 25-23, 24-26, 25-19), na yo itwara iri rushanwa ku nshuro ya kabiri yikurikiranya.

Ikipe ya Groupe Scolaire Officiel de Butare ni yo yegukanye umwanya wa gatatu nyuma yo gutsinda ikipe ya Nyanza TSS amaseti 3-2 (18-25, 25-23, 25-20, 14-25, 18-16).

Shampiyona y’abato ya Junior League iba buri mwaka, itegurwa ku bufatanye bw’ibigo by’amashuri n’Ishyirahamwe ry’Umukino wa Volleyball mu Rwanda (FRVB).

Shampiyona y’uyu mwaka yatangiye mu Ukwakira 2025, yari igizwe n’amakipe 19 yose hamwe arimo atanu y’abakobwa na 14 y’abahungu.

Imikino ya nyuma ya Shampiyona y'Igihugu y'Abato muri Volleyball yabereye muri Petit Stade i Remera

GSO Butare ihanganiye umwanya wa gatatu na Nyanza TSS

Abakinnyi ba Gisagara Volleyball Academy bishimira kwegukana igikombe cya Rwanda National Volleyball Junior League ku nshuro ya kabiri yikurikiranya

GS St Aloys Rwamagana ikina umukino wa nyuma na ESB Kamonyi mu bakobwa

Byari ibyishimo ku bakinnyi ba St Aloys nyuma yo gutsinda amaseti 3-0

Abakunzi ba Volleyball bari bitabiriye

Perezida wa FRVB, Ngarambe Raphaël (hagati) ari mu barebye iyi mikino ya nyuma

Gisagara Volleyball Academy yongeye kugaragaza ko iri ku rwego rwo hejuru

Ikipe ya St Aloys Rwamagana yegukanye igikombe cy'iri rushanwa ku nshuro ya gatatu yikurikiranya