00:00:00 IGIHE NETWORK KN KINYARWANDA EN ENGLISH FR FRANCAIS

Memorial Kayumba ya 2021 ntikibaye

Yanditswe na Eric Tony Ukurikiyimfura
Kuya 5 Werurwe 2021 saa 08:13
Yasuwe :
0 0

Irushanwa ngarukamwaka rya Volleyball "Memorial Kayumba" ritegurwa n’Ishuri rya Groupe Officielle de Butare mu rwego rwo kwibuka Padiri Kayumba wigeze kuba Umuyobozi waryo, ntirizaba muri uyu mwaka wa 2021 kubera icyorezo cya COVID-19.

Padiri Kayumba Emmanuel wabaye Umuyobozi w’Ishuri ry’Indatwa n’Inkesha, yitabye Imana mu 2009. Kuva mu 2010 hatangijwe irushanwa rya Volleyball rigamije kumwibuka kuko na we yari umukunzi ukomeye w’uyu mukino.

Muri uyu mwaka wa 2021, iri rushanwa ryari gukinwa ku nshuro yaryo ya 12, ariko Ubuyobozi bwa Groupe Officielle de Butare bwatangaje ko ritazaba kubera COVID-19.

Mu itangazo bwashyize ahagaragara kuri uyu wa Gatanu, bwagize buti “Kubera icyorezo cya COVID-19 n’ingaruka cyagize ku nzego zitandukanye z’ubuzima bw’igihugu harimo n’ibikorwa bya siporo, uyu mwaka wa 2021 ntibyadushobokeye gutegura ayo marushanwa.”

Mu mwaka ushize, Ikipe ya REG VC mu bagabo na RRA VC mu bagore bakina Icyiciro cya Mbere ni zo zitwaye neza zegukana “Memorial Kayumba 2020”.

REG VC yatsinze ku mukino wa nyuma UTB VC yari fite iki gikombe cyaherukaga amaseti 3-2 (25-20, 24-26,13-25,28-23 na 15-8) mu gihe RRA VC yatsinze UTB VC na yo yari ifite iki gikombe amaseti 3-1.

Mu makipe y’Icyiciro cya Kabiri, mu bahungu, GSO Butare yegukanye igikombe itsinze Christ Roi amaseti 3-2 naho mu bakobwa ikipe ya ES Ste Bernadette Kamonyi aba ari yo yegukana igikombe.

Mu bakanyujijeho, ikipe ya BPR yegukanye igikombe itsinze ikipe ya Tout Age amaseti 3-1 naho umwanya wa gatatu wegukanwa na WASAC.

REG VC yatwaye Memorial Kayumba mu 2020 itsinze UTB VC
Memorial Kayumba ihuza amakipe menshi ya Volleyball avuye mu bice byose by'igihugu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .