Ni imikino mpuzamahanga ngarukamwaka yateguwe na Kampala Amateur Volleyball, KAVC yahuzaga amakipe yo mu bihugu bitatu byo mu karere birimo Kenya, u Rwanda na Uganda yakiriye iyo mikino yakinwe mu minsi ibiri, kuva kuya 6 no kuya 7 Kanama 2016.

Mu rwego rw’Abagabo iyi mikino yitabiriwe n’amakipe 11, 2 yo mu Rwanda: UNIK na Kigali Youth; Kenya yari ihagarariwe n’ikipe 1 ariyo Aspire naho Uganda yari ifitemo amakipe 8: KAVC-A, SKY; Sport-S, COBAP, KAVC-B, KCCA na Mbarara VC.

UNIK yegukanye umwanya wa mbere mu bagabo yashyikirijwe igikombe ndetse na sheki y'amafaranga ibihumbi 791 by'amanyarwanda naho RRA yabaye iya kabiri mu bagore ihabwa ibihumbi 395.

Mu rwego rw’Abagore iyi mikino yitabiriwe n’amakipe 10. U Rwanda rwari ruhagarariwe na RRA(Rwanda Revenue Authority) VC, Kenya nayo yarifitemo ikipe 1 Aspire naho Uganda yahagarariwe n’amakipe 8: Vision VC, KAVC-A, KAVC-B, KAVC-C, Nkumba University, Ndejje, Sport-S na KCCA.

RRA yashakaga gutwara iki gikombe ku nshuro ya gatatu, ndetse igahita icyegukana burundu ariko amahirwe yayinyuze mu myanya y’intoki nyuma yo gutsindwa na Aspire seti eshatu ku busa (25-10, 25-18, 25-16)ku mukino wa nyuma.

Mu bagore, RRA VC yageze ku mukino wa nyuma itsinze Ndejje yo muri Uganda seti 3-0 mu gihe Aspire yo muri Kenya yahageze imaze guhigika Vision Uganda kuri seti 3-0.

Naho mu bagabo, Sky yo muri Uganda yageze ku mukino wa nyuma imaze gutsinda Sport 3-2 naho UNIK yabonye itike yo kujya mu mukino wa nyuma imaze kwihererana Sport-S kuri seti 3-0.

Iri rushanwa rya Volleyball ryabaga ku nshuro ya 20.