Ku nshuro ya kabiri Urwego rw'Igihugu rushinzwe Intwari, Imidari n'Impeta by'Ishimwe ku bufatanye n’ishyirahamwe ry’umukino wa Volleyball mu Rwanda, bateguye irushanwa ry’igikombe cy’Intwari.

Mu mukino ufungura iri rushanwa, ikipe y’i Gisagara yahabwaga amahirwe imbere ya APR VC yiganjemo abakinnyi bakiri bato bakina mu ikipe y’igihugu y’abatarengeje imyaka 20.

Abawitabiriye muri Petit stade i Remera batunguwe kuko Gisagara igendera ku bakinnyi bafite inararibonye nka Dusabimana Vincent bita Gasongo na Muyango Théodore, yatsinzwe amaseti 3-1.

Bari batangiye neza batsinda iseti ya mbere ku manota 25-21, ariko APR VC ifashijwe na Ronald Muvara yatsinze amaseti yakurikiyeho, ku manota 25-23, 25-23 na 25-20.

Umukino ukomeye kurusha indi wahuje amakipe yashoye amafaranga menshi mu kugura abakinnyi n’abatoza bakomeye mu ntangiriro z’uyu mwaka w’imikino, aho REG VC yagombaga guhangana na UTB VC.

Uyu mukino nawo watunguranye kuko warangiye wihuse. Ikipe ya REG VC iyoboye urutonde rwa shampiyona y’u Rwanda ntabwo yitwaye neza kuko abakinnyi bayo barimo na kapiteni w’ikipe y’igihugu y’u Rwanda Mukunzi Christopher ntabwo bari mu bihe byiza.

UTB VC iyobowe na kapiteni Mutuyimana Aimable wakinaga na REG VC yavuyemo, yatangiye umukino iri ku rwego rwo hejuru, ishaka kwihimura ku ikipe ya Mugisha Benon yabatsinze muri shampiyona.

Abakinnyi b’iyi kaminuza itozwa na Fidèle Nyirimana batsinze iseti ya mbere bitabagoye kandi byihuse cyane ku manota 25-19. Abakinnyi bafite inararibonye ba REG VC barimo Ndamukunda Flavien bakoresheje imbaraga nyinshi ngo bagarure ikipe mu mukino ariko birabananira batsindwa izindi seti ebyiri, amanota 25-22 na 25-19.

Iyi mikino yafunguye igikombe cy’Intwari gikomeza gukinwa kugera tariki 1 Gashyantare ku munsi wahariwe kuzirikana Intwari z’u Rwanda, hakazamenyekana ikipe itwara igikombe. Umwaka ushize cyatwawe na Gisagara VC.

Amafoto: Julius Ntare