Uyu musore ukina hagati (center player) yuriye indege mu ijoro ryo kuri uyu wa Kane yerekeza mu gihugu cyo mu Majyaruguru y’Isi kugira ngo arebe niba yakina nk’uwabigize umwuga mu myaka iri imbere.

Musoni w’imyaka 23 y’amavuko ni umukinnyi ntasimburwa mu ikipe y’igihugu nkuru ndetse yakiniye iy’abatarengeje imyaka 23 ndetse yanakiniye ikipe y’abatarengeje imyaka 21, aho yanitabiriye amarushanwa yabereye muri Turukiya muri Nzeli umwaka ushize.

Fred Musoni yasinyiye Rayon Sports VC avuye muri APR VC hari muri Nzeli umwaka ushize wa 2014. Mbere yo kugenda yagize ati "Nerekeje muri Finland, ngiye mu igeragezwa, nibigenda neza nkayitsinda nzaganira nabo ibijyanye n’amasezerano ku buryo nzahita nkinira iyo kipe"

Iki ni icyuho gikomeye ku ikipe ya Rayon Sports VC ihanganiye igikombe na APR VC ndetse na INATEK VC. Akaba yarafashije Rayon Sports kwegukana ibikombe bibiri byo kwibuka Jenoside Memorial Tournament yo mu mwaka wa 2014 na 2015 aho bari batsinze APR ku mikino yombi.

Ikipe ya Liiga-Riento yashinzwe mu 1914 ntiritabira amarushanwa mpuzamahanga, gusa ni ikipe ikomeye muri Finland ku bijyanye no guhatana mu bikombe by’imbere mu gihugu. Iyi kipe, mbere y’umwaka wa 2009 yitwaga Mutalan Riento.