Iri rushanwa ryiswe "Memorial Rutsindura" riteganyijwe hagati ya tariki 23 na 24 Kamena 2018 rikazakinwa mu byiciro birindwi birimo abagabo n’abagore mu bato n’abakuru bari mu makipe ari mu Cyiciro cya Mbere n’icya Kabiri, ibigo by’amashuri, abahoze bakina bageze mu za bukuru ndetse na volleyball yo ku mucanga.

Padiri Uwineza Placide uri mu bashinzwe gutegura iri rushanwa yatangarije abanyamakuru ko intego nyamukuru ituma riba ngarukamwaka ari ukugira ngo hatangwe ubutumwa bwo kurwanya Jenoside kuko na Rutsindura ariyo yazize.

Yagize ati “Irushanwa ryacu rifite impamvu ebyiri. Iya mbere ni uko twibuka Rutsindura wari umutoza wa Volleyball muri Petit Seminaire Virgo Fidelis akaba n’umutoza ku rwego rw’igihugu, tukaba twibuka ko yazize Jenoside yakorewe Abatutsi. Ni umwanya rero dufata tugatanga ubutumwa bwo kurwanya Jenoside n’ikindi kibi cyose mu rubyiruko n’abandi.’’

Yakomeje agira ati ‘‘Impamvu ya kabiri ni ukugira ngo umukino wa Volleyball Rutsindura yubatse hano nk’umuco utazigera uzima ahubwo dukomeze tuwuteze imbere no mu gihugu hose.’’

Iri rushanwa rizabera ku bibuga bitandukanye mu Karere ka Huye harimo ibyo muri Petit Seminaire Virgo Fidelis, ibya Groupe Scolaire Officiel de Butare, ibya Kaminuza y’u Rwanda, Ishami rya Huye, ibya IPRC South ndetse n’iby’Akarere ka Gisagara.

Umwaka ushize iri rushanwa ryegukanywe na REG VC itsinze APR VC amaseti 3-1 mu makipe akina icyiciro cya mbere, mu bakobwa RRA VC yegukanye igikombe itsinze APR VC amaseti 3-1 naho mu makipe yo mu Cyiciro cya Kabiri (Serie B) cyatwawe na Groupe Scolaire Officiel de Butare (Indatwa) itsinze Petit Séminaire Karubanda amaseti 3-1.

Rutsindura afatwa nk’umwe mu bagize uruhare rukomeye mu iterambere rya Volleyball mu Rwanda by’umwihariko mu Kigo cya Seminari Nto ya Karubanda aho yayibereye umutoza kuva mu 1983-1994, ayihesha ibikombe bitandukanye ariko anakundisha abana bo muri iki kigo uyu mukino kugeza n’ubu wabaye umuco.

Yanabaye umusifuzi ku rwego rw’igihugu, Umutoza mukuru w’Ikipe y’Igihugu y’Abagore ya Volleyball kuva mu 1988-1990 ndetse aba na Visi Perezida w’Ishyirahamwe ry’Umukino wa Volleyball mu Rwanda.