Aka gace katangiye mu bagabo, REG VC ari yo iyoboye urutonde kuko ifite amanota 42 inganya na Gisagara VC, zigakurikirwa na APR VC ifite amanota 36.

Mu bagore, APR WVC iyoboye izindi n’amanota 42 ndetse yizeye kwegukana Igikombe cya Shampiyona.

Ku wa Gatandatu, umukino wabimburiye iyindi mu bagabo ni uwo REG VC yatsinzemo KVC amaseti 3-0. Iseti ya mbere yayitsinze ku manota 27-25, iya kabiri kuri 25-18 naho iya nyuma iba 25-17.

Gisagara VC na yo yahuye na IPRC Musanze, bitayigoye iyi kipe yo mu Majyepfo yegukana intsinzi y'amaseti 3-0. Iya mbere yabaye amanota 25-15, hakurikiraho iya 25-13 naho iya nyuma iba 25-21.

Umukino wakurikiye iyi wahuje APR VC na Kirehe VC. Nubwo byayigoye cyane ariko APR yatsinze amaseti 3-0. Iseti ya mbere APR yayitsinze ku manota 25-23, iya kabiri iyitsinda 29-27, naho iya nyuma iba 25-22.

Mu bagore, RRA WVC yatsinze IPRC Kigali WVC amaseti 3-1. Ikipe y'Ikigo gishinzwe Imisoro n'Amahoro yinjiye mu mukino mbere, yegukana iseti ibanza ku manota 25-13, ku iseti ya kabiri IPRC Kigali igaruka neza iyitsinda 18-25.

Mu maseti abiri ya nyuma ni ho RRA yagaragarije ko ari ikipe nkuru, iyegukana nyuma yo gutwara iya gatatu itsinze 25-14, iya nyuma nayo iba 25-13.

Umukino wakurikiyeho Forefront yateye mpaga St Bernadette WVC y’amaseti 3-0.

Nyuma yazo, Ruhango WVC yatsinze IPRC Huye WVC biyoroheye amaseti 3-0. Iseti ya mbere yabaye 25-09, iya kabiri iba 25-17, iya nyuma iba 25-16.

Imikino ya ½ iteganyijwe kuri iki Cyumweru tariki 8 Mutarama, irahuza ikipe ya REG VC na APR VC mu bagabo, Gisagara nayo ihure na Forefront VC mu bagabo.

REG VC yirangayeho mu gace ka gatandatu bigatuma Gisagara VC iyifata mu manota, irasabwa kudakora ikosa kuri iki Cyumweru kugira ngo igumane umwanya wa mbere.

Nyuma y'aka gace ka karindwi, hazakinwa aka munani ari na ko kazasoza umwaka w'imikino wa 2022/23. Ikipe ya mbere muri buri gace ibona amanota arindwi, zikagenda zirushanywa inota kugeza ku ya nyuma igira inota rimwe.

Mu bagore, APR WVC irakina na RRA WVC mu mukino uza kubera kuri Stade ya Ngoma, naho Forefront WVC ihure na Ruhango WVC mu mukino ubera kuri GS Kabare.