Abakinnyi bane bashya ni Madut Abuk Wol Ngong ukomoka muri Sudani y’Epfo, n’Abanyarwandakazi Ndagijimana Nancy, Uwase Hyguette na Umuhuzanase Dior.

Ni mu gihe, Jennifer Tembo wo muri Zimbabwe na Ukpabi Elisabeth Ijeoma wo muri Nigeria bo bongereye amasezerano.

Mu muhango wo kubakira no kubasinyisha amasezerano, Perezida wa RRA VC, Uwitonze Jean Paulin, yashimiye abakinnyi bahisemo gukinira iyi kipe, anabasaba kuzaharanira ishema ryayo biciye mu myitwarire myiza no gukorera hamwe.

Yagize ati “Turifuza ko mwakwita cyane ku myitwarire n’ikinyabupfura haba mu kibuga no hanze yacyo. Nimukorana nk’ikipe, mugashaka intsinzi nk’ikipe, nta kabuza ibikombe muzabitwara,”

Umutoza mukuru wa RRA VC, Mutabazi Elie, yavuze ko ikipe yiteguye neza kurusha umwaka ushize, kandi ko yizeye ko bazatanga umusaruro ugaragara.

Ati “Turimo gukora imyitozo yisumbuye ku yo twakoze umwaka ushize. Ndizera ko abakinnyi bashya bazadufasha kuzamura urwego rw’ikipe no gusubira ku rwego rwo hejuru twifuza.”

Shampiyona ya Volleyball izatangira ku wa Gatanu tariki 17 Ukwakira 2025, umukino wa mbere wa RRA VC ukazaba ku wa Gatandatu, icakirana na Ruhango WVC. Mu cyumweru gikurikiyeho, tariki 24 Ukwakira 2025, RRA VC izahura na Police WVC mu mukino utegerejwe cyane.

Igice cya mbere cya shampiyona kizasozwa ku wa 6 Ukuboza 2025, RRA VC ihura na APR WVC.

RRA VC ni ikipe y’ubukombe imaze imyaka isaga 17, yegukana Igikombe cya Shampiyona inshuro 10 n’ibindi nka Memorial Kayumba yatwaye mu 2014, 2017, 2020, 2022, NSSF KAVC 2024.

RRA yaguze abakinnyi bane bashya, yongerera babiri amasezerano

RRA izatangira shampiyona ku wa Gatandatu ikina na Ruhango WVC