Umunsi Mukuru w’Igitambo wizihizwa hazirikanwa igihe Aburahamu yari agiye gutamba umwana we Ismail ho igitambo ariko Imana ikamuha intama mu cyimbo cy’uwo mwana.

Ni wo Munsi Mukuru uza ku mwanya wa kabiri mu yizihizwa mu Idini ya Islam nyuma ya Eid al-Fitr. Uyu munsi ubanzirizwa n’isengesho rikurikirwa n’igikorwa cyo kubaga amatungo atangwamo ibitambo hagamijwe gushyira mu bikorwa inkingi yo ‘gutamba’ imwe mu zigize ukwemera mu idini ya Islam.

Itangazo RMC yashyize ahagaragara rivuga ko isengesho ry’uwo munsi rizabera kuri Kigali Pele Stadium i Nyamirambo guhera saa kumi n’ebyiri za mu gitondo.

Ubuyobozi bukuru bwa RMC bwanibukije Abayilamu bose ko ku wa 27 Kamena ari umunsi wo gusiba ubanziriza Umunsi w’Igitambo nyirizina.

Mu bikorwa biranga Abayisilamu ku munsi w’Igitambo harimo n’iby’urukundo nko gufasha abatishoboye. Isengesho ryo kuri uwo munsi rigomba gukorwa kare mu gitondo izuba rikirasa kandi rigahuriza hamwe abantu benshi.

Abayisilamu bahuriye mu isengesho rya Eid al-Adha mu 2022