Papa Francis, agiye gushinga ikigo kirinda abana ihohoterwa rishingiye ku gitsina muri kiliziya Gatolika. Iki ni igikorwa cya mbere akoze muri Kiliziya cyamagana ihohoterwa rishingiye ku gitsina ku bana.

Nk’uko tubikesha televiziyo France 24, Papa Francis yemereye itsinda ry’abakaridinali (cardinals) umunani ko hagiye gushyirwaho komisiyo idasanzwe yo gukurikirana umutekano w’abana bakarindwa ihohoterwa rigikorerwa bamwe muri bo bo muri Kiliziya Gatolika; hakaba n’igihe rikozwe n’abapadiri n’abasenyeri.

Umwe muri aba bakaridinali witwa Sean Patrick O’Malley, yabwiye itangazamakuru ati “Iyi Komisiyo idasanzwe igiye gushyirwaho kugira ngo ijye igira inama Papa ku bijyanye n’ihohoterwa rishingiye ku gitsina rigaragara muri Kiliziya rinamufashe gushyiraho uburyo bwo kwita ku bagizweho ingaruka n’iryo hohoterwa.”

Kuri iyi nshuro biragaragara ko Papa Francis yahagurukiye ihohoterwa rishingiye ku gitsina n’ubusambanyi ku bashumba ba Kiliziya, kuko biri mu byangije isura ya Kiliziya bikageza n’aho bivugwa ko Papa Benedigito yaba yaregujwe n’inkeke Vatican yahozwagaho havugwa ko nta gikorwa mu kiliziya kirengera abakomezaga guhohoterwa.

Ibyavugwaga cyane byari ukuba nta gahunda n’imwe yari ihari yo kurinda abana muri kiliziya, no kudakurikirana ibibazo byavugwaga ku busambanyi bwavugwaga ku bashumba ba kiliziya bwatumye itakaza amagana y’amamiliyoni mu madolari ya Amerika kubo byabayeho ku isi.

Abazaba bagize iyi komisiyo ntibaratoranywa nk’uko Karidinali O’Malley yakomeje avuga, ariko bitegerejwe ko abazatoranywa bazashyiraho gahunda zihamye zirinda abana, kugenzura abashumba ba kiliziya no gushyiraho uburyo bwihuse bwo gufasha abahohotewe biciye mu mikoranire y’abashumba ba kiliziya.

France24 itangaza ko muri iki cyumweru ari bwo Vatican yanenzwe kuba idakurikirana ibibazo by’ihohoterwa rikomeje kuvugwa muri kiliziya, aho bamwe banenga Papa no kudahita atanga umwanzuro wihuse.

Nyuma yo kumva ko hari abanenga imikorere ye, hahise hatangazwa umupadiri umwe wo muri Boston ushinjwa kugira uruhare mu ihohoterwa ry’abakiri bato mu mwaka wa 2011.