Mu nama iteraniye mu Hotel Umubano i Kigali, kuri uyu wa Gatandatu tariki ya 13 Nyakanga 2013, Inama Nkuru idasanzwe y’Umuryango w’Abaislam mu Rwanda ifashe icyemezo kidasubirwaho ko Sheikh Gahutu Abdulkarim atakiri Mufti w’u Rwanda. Nk’uko itegeko rigenga AMUR ribiteganya by’Agateganyo Mufti w’u Rwanda abaye Sheikh Kayitare Ibrahim, Ukuriye inama y’ubutabera muri AMUR.

Si Sheik Gahutu Abdulkarim kuko na Mufti wungirije ahise akurwaho Sheikh Djumatatu Nsengiyumva n’imyanzuro yemejwe n’inama yashyizweho mu rwego rwo kugarura ubumwe n’ubwiyunge muri AMUR ariko na we akaba yari uw’agateganyo.

Inama Nkuru idasanzwe y’Umuryango wa Islam mu Rwanda yateranye ku wa 13 Nyakanga 2013, yayobowe n’Umuyobozi w’Imana y’ubutabera muri uwo muryango (Qadhwi) Sheikh Kayitare Ibrahim akaba ari na we Mukemurampaka Mukuru muri AMUR, yemeje ko Qadhwi mukuru ayobora by’agateganyo Umuryango w’Abayisilamu mu Rwanda mu gihe cy’amezi atandatu. Sheikh Omar Sulaiman Iyakaremye yagizwe Mufti wungirije by’agateganyo na we akazamara amezi atandatu.

Inama Nkuru idasanzwe ya AMUR yemeje ko ihererekanyabubasha hagati ya Mufti mushya w’agateganyo na Mufti wegujwe riba bitarenze iminsi itatu kandi hafashwe icyemezo cyo guhagarika inama yari yatumiwe na Mufti Gahutu yagombaga kuba ku wa 14 Nyakanga 2013 kubera ko yatumiwe mu buryo butemewe n’amategeko.

Ingingo yakomeje kugarukwaho yatumye Mufti Gahutu yeguzwa ni uko ngo yakomeje kugirwa inama kenshi n’inzego zinyuranye zimusaba ko hakoreshwa inzira zose zishoboka amakimbirane yavutse muri Islam agakemuka ariko we agahitamo kuvunira ibiti mu matwi.

Aha abari bitabiriye inama bafashe urugero ku Kanama kashyizweho muri Islam kandi kumvukanweho n’impande zombi, kugira ngo hashakwe uburyo ikibazo cy’ubwumvikane buke muri Islam cyakemuka, ariko imyanzuro yavuyemo Mufti Gahutu yanga kuyishyiraho umukono.

Hafashwe umwanzuro ko uwanze gushyira umukono ku myanzuro yavuye mu kanama bumvikanyeho atazashyira mu bikorwa iy’inama rusange idasanzwe hafatwa umwanzuro wo kumweguza we na Mufti wungirije.

Mu matora hemezwa ko Mufti Gahutu Abdulkarim avaho

Abitabiriye inama bungurana ibitekerezo

Soma izindi nkuru bifitanye isano: Kanada hano, Indi nkuru, Soma n’iyi