Abakirisitu bo mu madini atandukanye yizihiza umunsi mukuru wa Noheli mu kwibuka ivuka rya Yesu (Yezu) Kirisitu (Kirisito), bitabiriye umugoroba ubanziririza uyu munsi mu buryo bw’umwihariko ugereranyijwe n’uko bisanzwe bikorwa ku yandi matariki ya 24 Ukuboza, nubwo atari bose kuko hari n’abo utagize icyo ubwira nk’umugoroba utegura Noheli.

Insengero za Kiliziya Gatolika zo mu Mujyi wa Kigali nka ‘Sainte Famille’ na ‘Saint Michel’ zagiye zisoza Misa zitegurira Abakirisitu kwinjira ku munsi wa Noheli nyirizina bitarenze mu ma saa mbili z’umugoroba.

Kuri Kiliziya ya Sainte Famille abakirisitu bitabiriye umugoroba wa Noheli (igitaramo cya Noheli) basoza kare

Havugimana Michel wasengeye kuri Paruwasi ya Sainte Famille, avuga ku kuba igitaramo kirangiye hakiri kare yagize ati « Nishimiye uyu mwanya nongeye guhabwa wo kwibuka umwami wavutse ku bwanjye. Nifuzaga kurara mu gitaramo ariko nta cyo bitwaye no gukomeza kuzirikana agaciro k’uyu munsi n’imuhira aho nsangira n’umuryango wanjye. »

Fabiyani Sekanyana, umaze imyaka isaga 50 ari umukirisitu twasanze kuri Paruwasi ya Saint Michel, ati « Kera uyu munsi wizihizwaga kurusha Ubunani (Bonne Annee) kuko twe abakirisitu twibukaho ivuka rya Yezu ariko tukanibukaho ko dukwiriye gutoza abana bacu ingeso n’uburere bwa gikilisitu. »

Amasengesho yo kuri Saint Michel yaherutswe n’umuhango wo kubatiza, aho ababyeyi babo bemeje ko umwana ubatijwe kuri Noheli bimufasha gukurana roho nzima iyo yongerewe uburere.

Nubwo Kiliziya Gatolika zarangije aya masengesho hakiri kare, Abakirisitu b’itorero rya Vivante- Kimihurura bo bagize ibihe birambuye kuko bagejeje mu masaha ya saa tanu z’ijoro.

Mu itorero Vivante ho batinzemo ugereranyije n'uko byagenze muri Gatolika

Iri torero ryari ryatumiye abahanzi baririmbira Imana nka Gaby Kamanzi, Uwiringiyimana Theogene (Bose Babireba) n’abandi.

Straton Gataha, Umushumba w’Itorero Vivante mu Rwanda yagize ati “Uyu munsi urakomeye kuri twe kuko ntitwibuka Yesu nk’agahinja ahubwo tumwibuka nk’umwami waje mu Isi akadukiza ibyaha. Kumuhimbaza kwacu ntibyakagize umupaka ariko gahunda igomba gusoza bitarenze saa tanu.”

Amwe mu matorero yateguye tariki ya 25 gusa

Nubwo hari amadini yizihije uyu munsi ubanziriza Noheli, Itorero rya Angilikani mu Rwanda Diyosezi ya Kigali riherereye mu Biryogo ntiryigeze rikoranya Abakirisitu muri uyu mugoroba kimwe n’itorero rya Zion (Kwa Gitwaza) riherereye mu Murenge wa Gatenga hafi ya Rwandex, kuko twahageze dusanga bibereye mu bindi bitandukanye n’amasengesho abandi bari bakoze.

Itorero rya Angilikani Diyosezi ya Kigali ntiryigeze riterana ritegura Noheli

Aya matorero yo yari mu nyiteguro y’uyu wa 25 Nyirizina (Noheli), nk’uko twabitangarijwe n’abarimo bategura insengero mu mugoroba abandi bahimbazagamo Imana.

[email protected]