Papa Francois yongereye ku rutonde rw’abatagatifu Abahinde babiri n’Abataliyani 4 asaba mu gitambo cya misa cyasomewe ku cyumweru tariki ya 23 Ugushyingo ku kibuga cyitiriwe Mutagatifu Petero i Roma ahari imbaga y’ibihumbi by’abakirisitu.

Ibiro Ntaramakuru by’Abafaransa, AFP, bivuga ko abagizwe Abatagatifu ari uwitwa Kuriokose Elias Chavar washinze umuryango wa mbere w’abapadiri mu Buhinde na Eufrasia Eluvathingal.

Abataliyani bane bagizwe Abatagatifu barimo uwitwa Amato Roncani wabaye mu ba mbere bayobotse umuryango w’Abafaransisikani mu kinyejana cya 13 na Nicola da Longobardi nawe w’Umufaransisikani wabayeho mu kinyejana cya 19.

Hari kandi uwitwa Giovani Antonio Farina wari Musenyeri witiriwe abakene kuko yitangiye uburezi bw’abana b’abakobwa baturuka mu miryango ikennye, hamwe n’uwitwa Ludovico da Casoria washinze umuryango w’abafureri b’impuhwe (Frères de la charité) ndetse wanarwanye ishyaka ryo kuvana abirabura mu bucakara.

Akimara kubagira Abatagatifu papa yasabye abakirisitu b’u Buhinde n’abatuye Isi muri rusange kubaho mu nwiyunge no mu bwumvikane.

Yagize ati “Binyujijwe kuri aba batagatifu b’Abahinde bakomoka i Kerala Nyagasani yaguye iyogezabutumwa rya Kiliziya y’u Buhinde kugira ngo abakirisitu baho bigire ku rugero rwabo rw’ubwumvikane n’ubwiyunge maze nabo baakomeze iyo nzira y’ubufatanye no kubana kivandimwe”.

Mu Buhinde abakirisitu bagize 2% by’abaturage bose, mu duce tumwe na tumwe, abo mu idini ry’Abahindu bakunze kubatoteza.

Ubutagatifu ni urwego uwapfuye ashyirwamo na Kiliziya Gaturika nyuma yo kugenzura imyitwarire n’ibikorwa byamuranze bigashimwa bikomeye cyane.

Iryo genzura rimara igihe kirekire cyane, aho mbere yo gushyirwa mu rwego rw’abatagatifu biyambazwa n’abakirisitu mu masengesho ngo babasabire ku Mana babanza gushyirwa mu kindi cyiciro cyitwa icy’Abahire.