Ibi bihembo bitanzwe ku nshuro ya mbere, byashyizweho mu rwego rwo gushimira abaramyi bakomoka mu bihugu bitandukanye bari gukora umurimo neza muri Afurika y’Iburasirazuba.

Kuri uyu wa 25 Kanama 2019 mu mujyi wa Nairobi nibwo hatangajwe abatsindiye ibihembo bya 2019 bakomoka mu bihugu byo muri Afurika y’Iburasirazuba birimo u Rwanda, Uganda, Kenya, u Burundi, Tanzania, Ethiopie, Eritrea, Somalia na Sudani y’Epfo.

Abahatanye batorwaga n’abakunzi babo binyuze kuri telefoni na interineti kuva ku wa 15 Kamena kugeza ku wa 15 Kanama 2019.

Mu banyarwanda bahataniraga ibi bihembo harimo ababashije kubyegukana nka Adrien Misigaro yegukanye igihembo cy’indirimbo yahuriweho n’abahanzi [Best Collaboration Ministration] yitwa “Nzagerayo” yafatanyije na Zawadi.

Gentil Misigaro we yatowe nk’umuhanzi ukorera ubutumwa mu mahanga wahize abandi [Best East African Minister in Diaspora], Prosper Nkomezi atsindira icy’umuhanzi ufite ijwi ryiza kurusha abandi [Best Vocalist] mu gihe indirimbo “Nzahora Nshima” ya Gaby Kamanzi yatowe nk’iyahize izindi zikoze mu buryo bwa Live [Best Live Ministration].

Indirimbo y’umwaka yabaye “Hassana Nkwagala Nnyo” Betty Muwanguzi, Joel Lwaga wo muri Tanzania atorwa nk’umuramyi w’umugabo wahize abandi mu myaka 10 ishize mu gihe Angel Benard yatowe nk’umugore wahize abandi mu myaka 10 ishize.

Abandi banyarwanda bahataniraga ibi bihembo ntibabashije kubibona barimo, Serge Iyamuremye wahatanaga mu byiciro bibiri na Aline Gahongayire na we wari mu byiciro bibiri.

Ambassadors Choir na Healing Worship Team nabo bahatanaga mu cyiciro cy’abaririmbira mu matsinda ariko ntibabashije kwegukana igihembo.

Adrien Misigaro na Gentil Misigaro babonye ibihembo

Gaby Kamanzi umaze igihe kinini mu muziki wo kuramya Imana nawe yashimiwe

Prosper Nkomezi yashimye nk'ufite ijwi ryiza kurusha abandi