00:00:00 IGIHE NETWORK KN KINYARWANDA EN ENGLISH FR FRANCAIS

Cardinal Kambanda yasabye abanyarwanda gufatira urugero kuri Padiri Ubald mu kubabarira

Yanditswe na Akimana Erneste
Kuya 9 January 2022 saa 06:43
Yasuwe :

Arkiyepiskopi wa Kigali Antoine Cardinal Kambanda yavuze ko Padiri Ubald Rugirangonga umurage yasize wo gusaba no gutanga imbabazi wabaye urufunguzo rw’ibibazo byari bikomeye birimo n’ingaruka za Jenoside yakorewe Abatutsi.

Ibi yabitangaje kuri uyu wa Gatandatu tariki ya 08 Mutarama 2022,ku gasozi k’Ibanga ry’Amahoro muri Diyoseze ya Cyangugu, mu misa yo kwibuka ndetse no gusabira Padiri Ubald Rugirangoga umaze umwaka yitabye Imana.

Béata Mukamusoni wakoranye na Padiri ubald yatanze ubuhamya bw’uburyo yemeye gutanga imbabazi ku bamwiciye umuryango muri Jenoside yakorewe Abatutsi 1994, abyigishijwe na Padiri Ubald.

Ati “Padiri Ubald yari umuntu uzi gufata icyemezo kandi ufite ubushishozi akabona ikintu kibi vuba vuba n’icyiza, ikibi agahita akigaragaza ako kanya.”

Antoine Cardinal Kambanda, yavuze ko Padiri Ubald yari umuntu wababaye kandi ko kubabarira bifitanye isano no kubabara.

Yagize ati”Padiri Ubald ni umuntu wababaye, buriya rero kubabarira bifitanye isano no kubabara. Imbabazi ni imbuto z’igiti cyo kubabara aricyo ‘musaraba’. Kugira ngo umuntu azashyikire intambwe yo kubabarira ni uko amanuka akinjira mu bubare bw’undi bakababarana kugira ngo amubabarire.”

Cardinal Kambanda yakomeje avuga ko Padiri Rugirangonga mu bubare bwe yamenyaga abababaye kandi akabagirira impuhwe akaba ari umurage ukomeye abasigiye.

Yashimangiye ko iyo mbuto y’imbabazi ariyo yabaye urufunguzo rw’ibibazo by’inzititane u Rwanda rwanyuzemo byatewe na Jenoside yakorewe Abatutsi.

Soeur Valerie Mukandeze wo mu Muryango w’Ababikira b’Abagabuzi b’Amahoro ya Kiristu Mwami bashinzwe na Padiri Ubald, yavuze ko yahoraga abigisha gukundana ndetse no kubana n’abandi mu mahoro.

Yagize ati: “Padiri Ubald yadusigiye umurage wo guharanira amahoro ndetse n’urukundo aho turi hose.Yakundaga kutwigisha ko ineza igomba gutsinda inabi tugaraharanira kubana neza n’abandi mu mahoro.”

Gahunda yo gusabira Padiri Ubald Rugirangonga yatangiye tariki ya 02 Mutarama 2022, isozwa tariki 08 Mutarama 2022. Muri iki cyumweru hatanzwe ibiganiro bigaragaza uruhare rwe mu kongera kubabaka umuryango nyarwanda nyuma yo gusenywa na Jenoside.

Padiri Ubald yabonye izuba muri Gashyantare 1955, yavukiye mu yahoze ari Segiteri ya Rwabidege muri Paruwasi ya Mwezi, Komini Karengera, Perefegitura ya Cyangugu.

Yagizwe umupadiri mu 1984 ubwo yari afite imyaka 29 y’amavuko. Uyu muvugabutumwa yari afite impano yo gusengera abarwayi bagakira, ndetse yateguraga ibiterane bigari bihuza abantu benshi bamwe bagatanga ubuhamya ko bari bafite indwara zananiranye ariko bakaba bakize.

Padiri Rugirangoga Ubald yamenyekanye cyane kubera ibikorwa by’isanamitima n’ibindi byiganjemo ibyo gusengera abarwayi bagakira. Yari amaze imyaka irenga 32 yarihaye Imana.

Mu mwaka wa 2015 Padiri Ubald yagizwe umurinzi w’igihango kubera uruhare yagize mu gutangiza gahunda y’Ubumwe n’Ubwiyunge muri Paruwasi ya Mushaka, ikaba yarabyaye imbuto nyinshi mu baturage ndetse inarenga imbibi igera no mu zindi.

Antoine Cardinal Kambanda atera amazi y'umugisha ku mva ya Padiri Ubald
Cardinal Kambanda yasabye abanyarwanda kwigira kuri Padiri Ubald mu bijyanye no kubabarira
Bamwe mu babikira ndetse n'abafurere bo mu muryango washinzwe na Padiri Ubald Rugirangoga bashyira indabo kumva aruhukiyemo
Abavandimwe n'inshuti bahaye icyubahiro Padiri Ubald umaze umwaka yitabye Imana

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .