Ni igiterane kigamije kugira Gahini ahantu h’ubukerarugendo nyobokamana hashingiwe ku bitangaza byagiye bihabera mu myaka yatambutse.

Iki giterane cy’iminsi itatu cyatangiye ku wa Gatatu, tariki 6 Nzeri 2023. Abacyitabiye biganjemo abaturutse mu Rwanda, Uganda ,Kenya na Leta Zunze Ubumwe za Amerika.

Ugeze i Gahini bakubwira amateka anyuranye ajyanye n’imyemerere arimo ‘Urukuta rw’Ibitangaza’, ’Inzu y’Ubumwe’, ‘Aho gutera igikumwe ushimangira ko utazava kuri Yesu’ n’amateka y’ububyutse bwakwiriye muri Afurika y’Iburasirazuba.

Ububyutse bwa Gahini buhera mu 1936, ubwo imbaraga z’Imana zamanutse ahantu hose zigakangaranya abanyabyaha, benshi bakemera kwihana, izo mbaraga zinakwira Afurika y’Iburasirazuba.

Urukuta rw’Ibitangaza rwagaragaye mu 2004, ubwo urukuta rw’inyubako ya Diyosezi rwiyasaga nta kirusagariye, byahuriranye n’uko mu Itorero rya Gahini harimo ibibazo by’amacakubiri.

Ubwo yatangizaga igiterane cy’ububyutse, Musenyeri wa Diyosezi ya Gahini mu Itorero Angilikani ry’u Rwanda, Dr. Gahima Manasseh, yavuze ko icyo giterane cyabanzirijwe n’ibiterane hirya no hino muri za paruwasi zose kandi byatanze umusaruro aho abantu bihannye ibyaha ari benshi.

Yavuze ko bamwe bavuye mu gukoresha ibiyobyabwenge, abandi baretse amakimbirane mu miryango n’ibindi.

Intego y’Igiterane igira iti “Nimutange imibiri yanyu, ibe ibitambo bizima byera bishimwa n’Imana, ariko kuyikorera kwanyu gukwiriye”. (Abaroma 12:1).

Igiterane cy’iminsi itatu kizarangwa n’umwanya w’ubutumwa, guhimbaza Imana, guhana ubuhamya no gusenga hasengerwa ibyifuzo bitandukanye.

Umwe mu bafite ubumuga yishimana na bagenzi be bitabiriye igiterane i Gahini

Itangizwa ry'iki giterane ryaranzwe n'akarasisi

Ubwo abitabiriye bacinyaga akadiho bashima Imana

Musenyeri Gahima Manasseh yashimye abitabiriye, abasaba kubyaza umusaruro iki giterane

Hitabiriye abantu batandukanye baba abo mu Rwanda no mu mahanga

Hakozwe akarasisi, bashimira Imana ku byiza ikomeje kubagezaho

Bafatanyije gushima Imana mu ndirimbo

Imwe mu nzu zakorewemo ivugabutumwa rya mbere i Gahini iracyahari

Uru rukuta rw'ibitangaza rwasadutse mu 2004 nyuma y'amakimbirane yari mu itorero

I Gahini hafatwa nk'ahantu ho gukorera ingendo nyobokamana mu Itorero Angilikani

Byitezwe ko iki giterane kizasiga benshi bihannye bagasubira ku nzira y'agakiza

Iki giterane cyitabiriwe n'abasaga ibihumbi icumi baturutse imihanda yose

Abakiristu baturutse hirya no hino mu Rwanda bitabiriye

Ibibumbano bya bamwe mu bamisiyoneri ba mbere i Gahini biragaragara

Gahini ni ho ububyutse mu Itorero Angilikani bwatangiriye

Mu bitabiriye harimo abavuye muri Leta zunze Ubumwe za Amerika

Muri iki giterane bamwe barihannye, bakira agakiza