Mu ijambo umushumba wa Kiliziya Gatolika yagejeje ku Bakirisitu bo ku Isi ubwo yasomaga Misa ya Noheli akavuga ijambo ryo guha umugisha Umujyi wa Roma n’Isi yose “urbi et orbi”yagarutse ku mabi akorerwa abakirisitu batuye mu bihugu by’abayisiramu.

Papa Francis yavuze ko abakirisitu bagera ku 150 000 bo muri Irak bahunze igihugu kubera umutwa wa Leta ya Kiyisilamu w’intagondwa z’abayisiramu.

Yakomeje asabira abantu bibasiwe n’intambara yashojwe n’intagondwa, mu bihugu bya Siriya na Irak, Nigeriya , Pakistan n’ahandi hirya no hino ku Isi.

Yasabye kandi ko haba amahoro mu karere ko mu Burasirazuba bwo Hagati kandi asaba ko haba ibiganiro hagati y’abashyamiranye muri Ukraine na Nigeria.

Inkuru dukesha urubuga rwa Liberation , ivuga ko Pape yafashe mu mugongo imiryango y’abana baherutse kwicirwa muri Pakisitani mu cyumweru gishize, akagaruka no ku rupfu rw’abanyeshuri 130 bishwe n’Abatalibani ahitwa Peshawar muri Pakisitani .
Ku munsi wa Noheli, Papa Francis yavuganye kuri telephone n’impunzi z’abanya Irak ziri mu nkambi iri hafi y’ahitwa Irbil mbere yuko asoma misa yo mu ijoro rya Noheli.

Yasabye izo mpunzi zavuye mu byabo kubera intagondwa zo mu mutwe wa Leta ya Kiyisilamu kwihangana kandi ababwira ko abazirikana cyane.

Ibitero by’umutwe wa Leta ya Kiyisiramu byatumye abakiristu babarirwa mu bihumbi n’abandi bantu bo mu yandi madini y’abanyamuke bahunga amago yabo muri Iraq no muri Syria.

[email protected]