Abayisilamu amagana basengeye muri Katederali y’Abaporoso y’i Washington (Washington National Cathedral) muri Leta Zunze Ubumwe za Amerika ku wa Gatanu tariki ya 14 Ugushyingo bereka abatuye Isi ko bagomba koroherana batitaye ku madini.

Iyo Katederali izwi mu mateka kuko Martin Luther King yayitangiyemo inyigisho nibwo bwa mbere yari isengewemo n’Abayisilamu nubwo abayisilamu bari barigeze kuyikandagiramo mu ngendo bajya bagirana hagati y’amadini.

Umugore utaramenyekanye yarogoye iryo sengesho mbere y’uko bamusohora yinjira muri urwo rusengero atera hejuru ati “Muturekere insengero. Kuki mudashobora gusengera mu misigiti yanyu ? ”.

Ikinyamakuru The Independent kivuga ko atari uwo mugore byababaje gusa kuko uwitwa Franklin Graham hari abanditse ku rubuga nkoranyambaga rwa Facebook ku munsi wabanjirije isengesho ko bibabaje kubona urusengero rwemera gufungura imiryango yarwo ku bandi bantu bemera iyindi Mana itandukanye n’ivugwa muri Bibiliya.

Iki gikorwa cyo kugaragza ubworoherane hagati y’abayoboke b’aya madini cyari cyateguwe n’umumenyi wo mu idini ya Islam, Ambasaderi wa Afurika y’Epfo muri USA n’umupasiteri witwa Canon Gina Gilland.

Iyo Katederali ifatwa nk’ikirango cy’amateka, isurwa na benshi yari yafunzwe kandi irinzwe bikomeye mu gihe Abayisilamu bayisengeragamo.

Muri iryo sengesho, Abayisilamu n’Abakirisitu basabwe kunga ubumwe bagafatanya mu kurwanya ubuhezanguni bugaragazwa na bamwe mu bayoboke b’amadini yombi.

Washington National Cathedral yatangiye kubakwa mu mwaka w’1907 irangira neza nyuma y’imyaka 83 nubwo na mbere y’aho nabwo yasengerwagamo.

Yakorewemo imihango yo gusezera bwa Nyuma Peresida wa Leta Zunze Ubumwe za Amerika Eisnhower mu mwaka w’ 1969 umwaka umwe mbere y’uko Martin Luther King ahatangira inyigisho agapfa iminsi mike nyuma yaho.

Katederali y’Abaporoso y’i Washington (Washington National Cathedral)