Iki gitaramo cyarimo andi makorali nka Hoziana, Agape, Barake Choir, Abatoranyijwe Choir, Itabaza Gahogo Choir, Goshen Musanze n’andi.

Shalom choir yageze ku rubyiniro saa 15:30 yakirwa mu buryo bwihariye, benshi banyurwa n’imirimbire yayo.

Perezida wa Shalom Choir, Ndahimana Gaspard, yashimye Imana ku munezero yatanze muri iki giterane asabira igihugu gukomeza kugira amahoro.

Dr Twahirwa Raymond waturutse muri ADEPR Ururembo rwa Huye Paruwasi ya Taba, yatanze ubuhamya bukomeye avuga uko yabaye ku mihanda ya Kigali ubwo yari ararangije amashuri abanza ariko ubu akaba yarahinduriwe ubuzima.

Yahumurije abakirisitu bari muri iki gitaramo ababwira ko Yesu ahari kugira ngo abagirire neza, ko ashobora guhindura ubuzima bwabo mu buryo batabitekerezaga.

Pasiteri Jeremie Munyonyo ni we wabwirije ijambo ry’Imana muri iki gitaramo yisunze ijambo riboneka muri Yohana 14:1 hagira hati “Ntimuhagarike imitima yanyu, mwizere Imana nanjye munyizere.”

Pasiteri Ndayizeye Isaïe wasengeye abantu 90 bakiriye agakiza, yavuze ko intego z’iki gitaramo ari ukugira ngo Yesu Kirisitu akore imirimo mu mitima y’abacyitabiriye.

Hatangijwe umushinga wa Shalom Charity

Ubwo iki gitaramo cyari kigeze hagati Shalom Choir yamuritse ku mugaragaro umushinga Shalom Charity, ugamije gufasha abatishoboye nk’uko biri mu ntego z’itorero rya ADEPR zo guhindura ubuzima bw’abantu mu buryo bwuzuye.

Abasaga 200 bo mu Karere ka Nyabihu na 150 bo mu Karere ka Huye bamaze kwishyurirwa mituweli binyuze muri uyu mushinga.

Ni mu gihe abakobwa batewe inda zitateguwe bo mu Murenge wa Kinyinya bahawe imashini zidoda zigera kuri 47.

Ibikorwa byo gufasha abatishoboye bizajya biba inshuro eshatu mu mwaka, abashaka gufatanya na Shalom Choir bakaba banyura kuri *182*8*1*717599# .

Mbonyi yeretswe urukundo ku buryo bukomeye

Umuramyi Israel Mbonyi wari utegerejwe na benshi yagiye ku rubyiniro ahagana saa moya z’ijoro yakirizwa impundu n’abakunzi b’umuzuki we bari babanje kumuhagara mu izina buri kanya mbere y’uko atangira.

Buri wese yavuye mu byicaro bye aririmbana na Israel Mbonyi indirimbo zitandukanye guhera kuri “Nzaririmba”, “Yankuyeho Urubanza”, “Baho”, “Nzibyo Nibwira” , “Nkumusirikare”, “Hari Ubuzima”, kugeza kuri “Yaratwimanye”.

Israel Mbonyi yashimiye Korali Shalom yamutumiye muri iki gitaramo avuga ko yatangiye kubakurikira kuva bamutumira kandi asigaye afashwa n’indirimbo zabo.

Amafoto:Kwizera Remy Moses

Abakirisitu bitabiriye banyuzwe n'ubutumwa bwari bugize indirimbo zaririmbwe muri iki gitaramo

Ababishoboye bacinye akadiho bataramana na Israel Mbonyi

Akanyamuneza kari kose ku bitabiriye iki gitaramo

Basanganiwe n'ibyishimo nyuma yo kumva indirimbo zibafasha kwegerana n'Imana

Iki gitaramo cyari cyiganjemo urubyiruko

Iki gitaramo cyari kigamije gufasha abakirisitu kuramya Imana mu buryo bwagutse

Umushumba Mukuru w’Itorero rya ADEPR mu Rwanda, Ndayizeye Isaïe, ari kumwe n’umugore we, Mushimiyimana Rachel

Perezida wa Shalom Choir, Ndahimana Gaspard

Pasiteri Jeremie Binyonyo wabwirije ijambo ry’Imana muri iki gitaramo

Israel Mbonyi yatangaje ko kuri Noheli tariki 25 Ukuboza 2023 azakorera igitaramo muri BK Arena

Israel Mbonyi yashimye Shalom Choir ku bwo kumutumira muri iki gitaramo

Ntora Worship Team yageze ku ruhimbi yinjirira mu ndirimbo ziri mu rurimi rw'Ikinyarwanda n'Icyongereza

Muri iki gitaramo Shalom Choir yamuritse umushinga wo gufasha abatishoboye

Iki gitaramo cyasize Shalom Choir ibaye korali ya mbere yabashije kuzuza BK Arena

Amajwi n'imiririmbire ya Korali Chalom byanyuze benshi

Abaririmbyi ba Shalom Choir bafata ifoto y'urwibutso na Israel Mbonyi