00:00:00 IGIHE NETWORK KN KINYARWANDA EN ENGLISH FR FRANCAIS

Chorale BUUIA yo muri St Famille yasubiyemo indirimbo imenyerewe muri ADEPR

Yanditswe na Akayezu Jean de Dieu
Kuya 21 Ugushyingo 2021 saa 07:20
Yasuwe :
0 0

Chorale Bikira Mariya Umubyeyi umara intimba Abayifite [BUUIA], ikorera ivugabutumwa ry’indirimbo zihimbaza Imana muri Paruwasi Gatolika ya Sainte Famille, yashyize hanze indirimbo ‘Yadutuye Imitwaro’ imenyerewe mu Itorero rya ADEPR.

Ni indirimbo isanzwe yifashishwa n’amatorero by’umwihariko ADEPR mu mwanya wo guhimbaza Imana, aho baba babyina bashimira Imana kubw’ibikorwa yakoreye abayo.

Ubuyobozi bwa Chorale Bikira Mariya Umubyeyi umara intimba Abayifite, butangaza ko bahisemo gusubiramo iyi ndirimbo kuko isanzwe yifashishwa mu bitaramo bitandukanye kandi igafasha abantu gushimira Imana.

Abaririmbyi baba bakangurira ndetse bakanashishikariza abantu kwibuka ibihe bikomeye banyuzemo , bagatabarwa n’Imana bityo bikababera impamvu yo kubona ubudahangarwa bwayo.

Niyonsenga Cassien wanditse iyi ndirimbo, yabwiye IGIHE ko yari isanzwe ikoresha mu bitaramo byo mu isengesho Charismatique, ariko ikaba yararirimbwaga uko buri wese yiboneye anakoresheje amagambo amujemo.

Ati “Isanzwe imenyerewe muri Kiliziya, si abarokore gusa kuko twese tuyihuriyeho. Twayihisemo kubera twari tuvuye muri ibi bihe bya Covid-19 nk’imitwaro twari twikoreye tukaba twarabivuyemo amahoro none turagenda twemye.”

Yakomeje agira ati “Yaje gushakirwa amagambo yafasha buri wese mu buzima abayeho ndetse ishyirwa ku manota ya muzika kugira ngo irusheho kunyura no gufasha abayumva gusingiza Imana.”

Ubuyobozi bwa Chorale BUUIAI, buvuga ko igitekerezo cyo kuyinonosora cyaje muri ibi bihe bya Covid-19, kuko n’ubwo ari ibihe bikomeye, nk’Abakirisitu byarushijeho kubagaragariza ububasha n’impuhwe z’Imana.

Ngendahayo Jean de Dieu wayishyize mu manota n’amajwi, ati “Twifashishije ijambo ry’Imana nk’uko turisoma muri Bibiliya Ntagatifu. Twashakiye iyi ndirimbo amagambo yibutsa abantu guhora basingiza kandi bashimira Imana uko byaba bimeze kose kuko ariyo mugenga wa byose.”

Yakomeje agira ati “Nka Chorale Charismatique ,dusanganywe umuco wo gusingiza Imana mu buryo butandukanye. Muri iyi ndirimbo,turakangurira abantu gusingiriza Imana, ibyo yabakoreye buri wese muburyo bwose ashoboye.”

Indirimbo ‘Yadutuye Imitwaro’ yatunganyijwe mu buryo bw’amajwi na Emmy Pro ukorera muri Universal Record mu gihe amashusho yafashwe anatunganywa na Aime Pride.

Chorale Bikira Mariya Umubyeyi umara intimba abayifite yatangiye ivugabutumwa ku wa 23 Ukuboza 2001; icyo gihe yari ifite abanyamuryango 60. Ubu ifite Abanyamuryango 85 barimo abaririmbyi n’abacuranzi. Ifite kandi abana 50 babyina muri Kiliziya.

Mu gihe cy’imyaka cumi 18 bamaze mu iyogezabutumwa bamaze gukora ‘CD’ y’indirimbo 13; Ifite kandi zimwe mu ndirimbo zamenyekanye cyane nka: “Nyemerera tugendane, Ngwino roho muhoza, Nzashimira Imana nzayisingiza n’izindi.

Abaririmbyi ba Chorale Bikira Mariya Umubyeyi Umara Intimba Abayifite ikorera ibikorwa byayo muri Paruwasi St Famille

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .